Летото е многу близу, а температурите во последниве денови тоа секако го најавуваат. Многумина ги израдува веста за отворање на базените и капалиштата каде можат да се разладат и да уживаат во сонцето. Сепак, иако може да биде убаво, капењето и преголемата изложеност на вода на јавните капалишта, носат со себе одредени опасности.
Еве на што треба да повнимавате и кој особено мора да обрне внимание кога е прашање капењето во базен.
Имено, опасноста од зарази (инфекции) на јавните капалишта од секогаш постоела и на сите им е познато дека токму овие место лесно може да станат извори на секакви инфекции. Сега тоа, се чини, е уште поголем проблем и страв за корисниците, доколку се земе предвид пандемијата со коронавирусот, која е се уште меѓу нас, и начините на кои се пренесува.
“КОВИД-19 не се шири преку вода, но мора да се почитуваат одредени препораки за спречување на ширење на вирусот и во овие објекти. Треба да се почитува физичкото растојание или оддалеченост, засилена лична и хигиена на просторот, дезинфекција на опремата и приборот за употреба, при секоја активност која оневозможува почитување на дистанца“, објаснуваат стручњаците.
Но, тие потенцираат дека доколку водата не е микробиолошки исправна, може да дојде до инфекции на увото, т.н. “пливачко уво“, инфекции на кожата, инфекции на уринарниот тракт.
Пливачкото уво е состојба која е непријатна и болна појава, и која се вбројува во најчестите летни воспаленија. Се добива по контакт со вода, на море или во базен.
Симптомите што може да ги забележите се отечено уво, болно на допир, додека кај некои се јавува и гноење, кое се третира со антибиотици и антимикотици, додека експертите советуваат воопшто да не се користат стапчиња за уши, бидејќи може да дојде до поголемо проширување на инфекцијата, посочуваат тие.
Базенот е исто така идеално место за појава на габички на кожата, на што особено влијаат топлината и влагата во влажните крпи и костумите за капење, но и влажните подови, соблекувалните во јавните базени. Симптомите на оваа инфекција се изразено црвенило на воспалената регија, а тоа најчесто се стапалата, чешање и пукање на кожата, а како превенција се препорачува носење влечки при посета на јавни базени.
Инфекција типична за базен е т.н. базенски конјунктивитис, кој уште се нарекува и инфекција на окото. Се јавува поради контаминација на базенот со урина на лице кое има одредена генитална инфекција. Симптоми што може да се појават се црвенило, солзење на окото, чувство на туѓо тело во окото, отекување на очниот капак и чувствителност на светлина. Како начин на лекување, лекарите препорачуваат да се побара стручна помош, но во повеќето случаи се даваат капки за очи со антибиотици за сите видови воспаленија на очите.
Она што исто така треба да внимавате доколку посетите базен е и непријатната дијареа. Всушност со пливањето, нуркањето и плискањето во топла вода, честопати се случува случајно да се проголта базенска вода, а експертите сметаат дека е доволна само една голтка, за да не излезете од тоалет во следните неколку дена.
