Истражувачите во рамките на една студија испрашале над 1100 тинејџери за нивните родители, за тоа колку се строги, дали ги казнувале за недозволени работи, ги игнорирале, правеле да се чувствуваат виновни и ги кажувале нивните грешки од минатото.
Врз основа на нивните одговори, избрале 23 млади лица чии родители имале строг, остар или манипулативен стил на родителство. Ги споредиле со деца на родители со поблаг стил на воспитување, кои поставувале правила, но јасно ставале до знаење дека правилата постојат затоа што ги сакаат своите деца. Утврдено е дека децата со многу строги родители имаат промени во активностите на гените што би можело да ги направи помалку способни да се справат со животните подеми и падови.
Претходни студии ги поврзуваа овие генетски промени со депресијата во подоцнежниот живот.
Прашалникот покажал дека 23-те деца со многу строги родители имале повеќе симптоми на депресија, како што се чувство на тага, осаменост или постојано чувство дека луѓето не ги сакаат – иако ниту едно од нив немало клиничка депресија.
“Многу строгото родителство може да го промени начинот на кој функционира ДНК, предизвикувајќи стрес во детството, што ги прави луѓето помалку отпорни на стрес подоцна. Оној тип на строги родители за кои зборуваме се оние кои ќе го испратат своето дете во неговата соба затоа што не јаде зеленчук, наместо да се обидуваат да го охрабрат да го јаде, или ќе викаат на децата што доцнат, наместо да им објаснат зошто треба да бидат дома порано“, вели д-р Ван Аше, од Универзитетот во Лувен во Белгија кој е автор на студијата.
Во истражувањето со над 1100 деца на возраст од 12 до 16 години, децата со “добри родители“ пријавиле дека разговараат со родителите за проблемите, дека се чувствуваат подобро и дека ги слушаат, додека тие им помагаат да го изберат сопствениот правец во животот.
Истражувачите ја разгледале ДНК на 21 дете со “добри“ родители и 23 со многу строги родители, испитувајќи повеќе од 450.000 делови од нивниот генетски код. Децата со построги родители имале посилна активност на голем број гени – шема на мозочна активност забележана и кај возрасните со депресија. Студијата сугерира дека децата со погруби родители се изложени на поголем ризик од депресија, иако ниту едно не било депресивно.
“Откривме дека строгото родителство, со физички казни и психолошка манипулација, може да доведе до промени кои сами по себе можат да доведат до тоа детето да има предиспозиција за депресија. Ова не се случува во иста мера доколку децата имале поттикнувачко и поддржувачко воспитување“, вели д-р Ван Аше.
