Играњето со кукли може да помогне во развојот на емоционалната интелигенција кај децата. Тим невронаучници од Универзитетот во Кардиф ги објави најновите наоди од студијата која ги истражува краткорочните и долгорочните ефекти на игрите со кукли врз развојот на детето.
Детето додека си игра со кукли размислува за туѓите мисли и емоции. Ова е многу важно за интеракција со други луѓе и снаоѓање во различни друштвени ситуации. Важно е за создавање и одржување пријателства и учење
Во втората година на истражувањето, истражувачите ја разгледувале важноста на она што децата го кажуваат додека си играат. Откриле дека децата тогаш водат сметка за туѓите мисли и емоции и на тој начин практикуваат социјални вештини кои можат да ги користат во интеракција со луѓето во реалниот свет, што исто така може да биде потенцијално корисно за севкупниот емоционален развој.
„Кога децата создаваат имагинарни светови и играат улоги со куклите, најпрво комуницираат на глас, а потоа ја интернализираат пораката за туѓите мисли, емоции и чувства. Ова може да има позитивни долгорочни ефекти врз децата, на пример, преку зголемување на социјалната и емоционалната обработка и градење социјални вештини, како што е емпатијата што може да се интернализира за да се изградат и формираат доживотни навики“, го коментира истражувањето д-р Сара Герсон, а пренесува „Мирор“.
Според глобално истражување, од 15.000 мајки и татковци на деца на возраст од три до десет години, 91 отсто ја оцениле емпатијата како клучна социјална вештина што би сакале да ја имаат нивните деца. Сепак, само една четвртина се свесни дека играњето со кукли може да им помогне на нивните деца да го развијат тоа.
„Се испостави дека детето, додека си игра со кукли, размислува за туѓите мисли и емоции. Ова е многу важно за интеракција со други луѓе и снаоѓање во различни друштвени ситуации. Важно е за создавање и одржување пријателства и учење“, вели д-р Герсон.
Истражувањето на Универзитетот во Кардиф сугерира дека играњето со кукли може да биде можност за децата да имитираат сцени и интеракции од нивниот секојдневен живот. Како резултат на тоа, куклите можат да им обезбедат можност да го рекреираат она што го виделе и слушнале дома, во паркот, градинката и училиштето, како и да вежбаат вештини што можат да ги користат во реални социјални ситуации.
