Новите варијанти на коронавирус, кој предизвикува Ковид-19, би можеле се поуспешно да се шират низ воздухот, сугерира новата студија. Истражувачите откриле дека пациентите заразени со алфа варијантата на вирусот – доминантниот сој што циркулирал за време на спроведувањето на студијата – испуштиле 43 до 100 пати повеќе вирус во воздухот отколку луѓето заразени со оригиналната верзија на коронавирусот.
Дел од ова се должи на фактот дека пациентите заразени со алфа варијантата имале зголемена количина вирус во брисевите од носот и плунката.
Но, количината на издишаниот вирус била 18 пати поголема отколку што може да се објасни со поголемото вирусно оптоварување, според трудот објавен во часописот „Clinical Infectious Diseases“.
Научниците исто така откриле дека лабаво затегнатите заштитни маски за лице што ги носат пациентите со благ Ковид-19 може да го намалат количеството на вирусни честички во околниот воздух за околу 50 проценти.
„Знаеме дека делта варијантата која сега кружи е уште позаразна од алфа варијантата“, рече коавторот Дон Милтон од Школата за јавно здравје на Универзитетот во Мериленд.
„Нашето истражување покажува дека варијантите стануваат се подобри во патување низ воздухот, па затоа покрај вакцинацијата, треба да обезбедиме и подобра вентилација и да носиме маски залепени за лицето за да го спречиме ширењето на вирусот“, пренесува „Хина“.
