Можеби ќе ви ја потроши целата топла вода и потајно ќе го изеде вашето омилено чоколадо, но време е да почнете да ја цените вашата сестра! Имено, се покажало дека вашата (понекогаш здодевна) сестра, може да има позитивен ефект на вашето ментално здравје, но и многу други аспекти во животот.
Истражување открило дека луѓето кои пораснале со сестра имаат поголема веројатност да бидат посреќни и попозитивни во животот. Студијата е спроведена на повеќе од 570 лица на возраст од 17 до 25 години на Универзитетот Улстер во Северна Ирска. Истражувачите им поставувале психолошки прашања на испитаниците за низа различни теми, вклучувајќи ги и оние поврзани со менталното здравје.
Резултатите од истражувањето покажале дека токму сестрите се тие кои ги охрабруваат поединците да зборуваат поискрено и отворено за своите чувства, обезбедувајќи им поддршка и пооптимистички поглед на животот. Професорот Тони Касиди открил дека сестрите “поттикнуваат поотворена комуникација и кохезија во семејствата“, што е основа на доброто ментално здравје.
Претходна студија спроведена од Универзитетот Бригам Јанг покажала дека лицата кои пораснале со сестри се пољубезни и поемпатични. Истражувањето исто така покажало дека растењето со сестра нè прави поамбициозни и независни. Имено, нормален процес е помалата сестра да ја имитира постара како дел од социјалниот развој. И иако не сме свесни за влијанието на сестрата, истражувачите тврдат дека токму сестрата е клучната личност во текот на развојот и создавањето на сопствениот карактер и личност.
Според научниците, растењето со сестра ги намалува негативните чувства за време на пубертетот; не се чувствуваме осамени, виновни или несакани. Поврзаноста или врската со сестрата е навистина важна во емоционалниот развој.
Едно е сигурно, да се има сестра е вистински благослов и најскапоцениот подарок во животот!
