Пет недели по вакцинирање со првата доза на вакцината на Фајзер, Модерна или АстраЗенека, стапката на инфекција кај возрасните лица од сите возрасти опаднала за 80 проценти, покажало италијанско истражување чии резултати беа објавени во саботата.
Првата студија на некоја земја-членка на ЕУ за реалното влијание на имунизацијата ја спроведоа научниците од италијанскиот Национален институт за здравје и Министерството за здравство, на 13,7 милиони луѓе вакцинирани во целата земја.
Научниците ги проучувале податоците од денот кога започнала вакцинацијата во Италија – 27 декември 2020 година, а студијата траела до 3 мај 2021 година.
Нивната анализа покажала дека ризикот од инфекција со вирусот SARS-CoV-2, како и од хоспитализација и смртен исход, постепено се намалувал по првите две недели од приемот на првата доза на вакцината.
Научниците ги проучувале податоците од денот кога започнала вакцинацијата во Италија – 27 декември 2020 година, а студијата траела до 3 мај 2021 година
„На триесет и петтиот ден од приемот на првата доза на вакцината, научниците забележале 80 проценти помалку случаи на инфекција, 90 проценти помалку хоспитализации и 95 проценти помалку смртни случаи од последиците на болеста“, соопштија од Институтот.
Оттаму истакнуваат дека истиот образец е забележана и кај мажите и кај жените, без оглед на нивната возраст.
„Овие податоци зборуваат во прилог на ефективноста на кампањата за вакцинација и потребата да се постигне што е можно поголема вакцинација на населението, за повеќе да не се соочуваме со итни медицински состојби“, рече претседателот на Институтот, Силвио Брусаферо.
Меѓу скоро 14 милиони учесници во италијанското истражување, 95 проценти примиле две дози од вакцините на Фајзер и Модерна, а останатите биле луѓе вакцинирани со вакцината на АстраЗенека, кои дотогаш се уште не ја примиле втората доза.
Досега, Италија ги следеше препораките на производителите, давајќи им на лицата кои се вакцинираат втора доза од вакцината Фајзер три недели по примање на првата, втора доза на Модерна четири недели по првата и втора доза на вакцината АстраЗенека 12 недели по првата, пренесува „Хина“.
