Она што им го зборуваме на нашите деца за време на оброците е исто толку важно како и она што го јадат. Затоа експертите за порталот Parents одлучија да издвојат неколку реченици кои родителите треба да ги избегнуваат да им ги кажуваат на децата за време на оброците. Како што објаснуваат, пораките што им ги испраќаме на нашите малечки за храната за време на оброците може да имаат неверојатно влијание, без разлика дали тоа е позитивно или негативно. Еве кои реченици треба да ги избегнувате.
„Можеш да добиеш десерт ако ја изедеш брокулата“
Ниту една храна, вклучително и десерт, не треба да му се нуди на детето како награда или да се ускратува како казна. На овој начин, не само што родителите го прикажуваат десертот како нешто одлично, туку му испраќаат и порака на детето дека мора да јаде невкусни работи за да дојде до вкусните.
Во случај детето да сака да јаде само десерт, без воопшто да го изеде главното јадење, експертите препорачуваат да се обидеме да служиме слатки само повремено. Исто така, можеме да се обидеме да послужиме десерт со главното јадење. Иако идејата може да звучи луда, таа всушност функционира кај некои деца.
„Премногу си пребирливо“
Родителите треба да избегнуваат да го користат овој термин пред своето дете бидејќи ставањето каква било етикета може да доведе до несакани последици. Експертите предупредуваат дека ако детето се нарекуваат пребирливо, тоа би можело да го сфати лично и да се чувствува лошо.
„Ова сигурно нема да ти се допадне“
Дури и во случај да сме сто проценти сигурни дека на нашето дете нема да му се допадне одредена намирница, никогаш не треба да го обесхрабруваме да ја проба. Имено, родителите треба да бидат максимално отворени кога е во прашање вкусот на нивното дете, бидејќи тоа навистина може да изненади.
„Изеди само еден залак/само пробај“
Иако ова навистина функционира кај некои деца и ги поттикнува да пробаат храна што инаку никогаш не би ја допреле, експертите предупредуваат дека оваа реченица кај повеќето деца само поттикнува непотребна борба на масата.
