Омикрон варијантата на коронавирус успева да преживее подолго на човечка кожа и на пластични површини во споредба со претходните верзии на коронавирусот, открија јапонските истражувачи во лабораториски тестови.
Сите варијанти на коронавирус биле целосно деактивирани од човечката кожа по 15 секунди изложеност на средства за дезинфекција на раце на база на алкохол
Токму таа екстремно висока „стабилност во околината“, односно високата инфективност и екстремната издржливост му овозможија на омикрон да ја замени делта како доминантна варијанта и да се шири со толку голема брзина, заклучија јапонските научници.
На пластичните површини, просечното време на преживување на изворниот сој на коронавирус беше 56 часа, алфа варијантата се задржуваше 191,3 часа, бета варијантата 156,6 часа, гама 59,3 часа и делта 114 часа.
Јапонските истражувачи открија дека омикронот се задржува на пластичните површини околу 193,5 часа, а резултатите, кои допрва треба да поминат стручна рецензија беа објавени на веб-страницата bioRxiv.
На примероците од кожа на човечки труп, просечното време на преживување на коронавирусот изнесувало 8,6 часа за изворниот вид, 19,6 часа за алфа сојот, 19,1 часа за бета, 11 часа за гама варијантата, 16,8 часа за делта и повторно најмногу – 21,1 часа за омикрон.
Сите варијанти на коронавирус биле целосно деактивирани од човечката кожа по 15 секунди изложеност на средства за дезинфекција на раце на база на алкохол.
„Затоа, и понатаму се препорачува да се продолжи со примена на сегашните практики за хигиена на рацете со средства за дезинфекција на база на алкохол, но и сапун, во согласност со упатствата на Светската здравствена организација“, пренесува „Хина“.
