Идните мајки, од борбата со потребата за грицки до земањето различни витамини, мораат големо внимание да посветат на исхраната, за да обезбедат непречен развој на бебето. Но, без разлика на целиот труд, голем број трудници не внесуваат доволно јод, минерал кој игра важна улога во развојот на невролошкиот систем на детето.
Научници од Австралија спровеле истражување во кое учествувале 200 жени, траело шест месеци и истите биле следени за време на бременоста и по породувањето. Иако секојдневно внесувале јод преку солта, голем број жени и натаму имале недостаток на јод во телото, покажала студијата. Утврдено било дека препорачаната доза за трудници била 200 микрограми јод дневно.
Недостатокот на јод за време на бременоста може да предизвика висок крвен притисок и негативно да влијае на физичкиот и менатлниот развој на детето. Јодот може да се најде во рибата и во морските плодови, јогуртот и збогатените млечни производи.
Но, од друга страна треба да се знае дека преголема количина на јод може да биде опасна за мајката и за бебето и да предизвика хипотиреоза, состојба која настанува кога штитната жлезда произведува премала количина на хормони.
Пред самостојно земање на повеќе намирници богати со јод, посоветувајте се со својот гинеколог и направете тест на урината и проверете дали веќе внесувате доволно јод. Доколку нивото е во нормала, единствено што треба е да продолжите со истите прехранбени навики како и до тогаш.
