Според новата студија на Универзитетот во Оксфорд, постојните вакцини можат да заштитат од бразилска мутација на коронавирусот, а сојот што првпат беше пронајден во Јужна Африка е моментално најголем проблем за производителите на вакцини, пренесува Ројтерс.
Истражувачите во оваа студија користеле примероци на крв од луѓе со антитела генерирани и по инфекција со Ковид-19 и по вакцинирање со вакцините на Оксфорд/АстраЗенека и Фајзер/Бионтек, кои се користат во Британија.
Податоците од студијата покажале скоро тројно намалување на нивоата на вирусна неутрализација од страна на антитела генерирани од вакцините за варијантата P.1 Бразил, а слично намалувањето било забележано и кај сојот, кој за прв пат беше идентификуван во Кент, Велика Британија.
Истражувачите во оваа студија користеле примероци на крв од луѓе со антитела генерирани и по инфекција со Ковид-19 и по вакцинирање со вакцините на Оксфорд/АстраЗенека и Фајзер/Бионтек, кои се користат во Британија
„Овие податоци сугерираат дека антителата предизвикани по природен пат и преку вакцини и понатаму можат да ги неутрализираат овие варијанти, но на пониски нивоа. Важно е дека бразилскиот сој е можеби помалку отпорен на овие антитела отколку што на почетокот се стравуваше“, истакнаа од Универзитетот во Оксфорд.
Ројтерс пренесува дека мутацијата, која за прв пат била идентификувана во Јужна Африка, покажува значително поголемо намалување на неутрализација на вирусот, 9 пати кај вакцината на Оксфорд/АстраЗенека, а 7,6 пати помалку кај вакцината на Фајзер/Бионтек.
Британските автори на студијата рекоа дека развојот на вакцина против јужноафриканскиот сој, познат како B.1.351, треба да биде најголем приоритет за научниците кои се занимаваат со развој на вакцини во светот, наведува агенцијата.
