Објаснувањата на децата за тоа дека овошјето и зеленчукот се здрави, во повеќето случаи нема да допринесе да ги јадат. Всушност, овие намирници попрво ќе ги изедат ако не инсистирате на тоа колку се здрави.
Истражување на Универзитетот во Чикаго, во кое учествувале деца на возраст помеѓу три и пет години, покажало дека најмали се шансите децата да ја изедат намирницата за која им зборувате дека е здрава. И се чини дека причината за тоа не е детскиот инает.
Имено, децата главно веруваат дека намирниците кои од нив ќе направат Попај се здрави, но без вкус. Затоа стручњаците препорачуваат родителите да ги стават овие намирници во чинија без било какви објаснувања.
„Ако им кажете на децата дека одредена храна ќе ги направи силни, тие веројатно ќе заклучат дека таа е без вкус и ќе одбијат да ја јадат. Затоа кажете им дека тоа се вкусни намирници и не објаснувајте ништо повеќе од тоа“, советуваат водачите на истражувањето д-р Мајкл Маимаран и д-р Авелет Бишбах.
За да го проверат ова, тие спровеле неколку експерименти. Во едниот, истражувачите им зборувале две различни верзии на приказна на децата. На едната група им раскажувале за девојчето Тара кое јадело брокула бидејќи била многу вкусна, а на другата група за девојчето Тара кое јадело брокула оти е многу здрава и дава енергија. Процентот на изедена брокула во првата група, бил поголем за над 45% во однос на втората група.
“Повеќето деца здравата храна ја поврзува со фразите ‘ќе бидеш силен’, ‘добро е за тебе’, ‘ќе ти даде енергија’, но децата сметаат дека намирниците од кои се расте и се станува силен, не се баш највкусни“, потенцираат истражувачите.
