Вашето едногодишно дете почнува да станува пребирливо во изборот на игри, повеќе не му се интересни играчките со кои дотогаш си играло, на сакате да му дозволите многу време да поминува пред телевизор, а немате идеја како да го анимирате…
Оваа ситуација може да биде фрустрирачка за родителите, па затоа ви носиме неколку совети како да поминете квалитетно време со вашето малечко.
- Цртајте!
Вашето дете обожува да црта! Дајте му лист хартија и боички и ќе добиете прекрасна чкртаница. Восхитувајте се на неговиот цртеж и прашајте го што нацртал. Најверојатно, нема да добиете одговор, па погодувајте: „Дали е ова зајаче?
„Прекрасно е, колку му се убави ушите!“
Покажете му на детето како да црта, запознајте го со боите, боете и цртајте заедно.
Сепак, за вашите ѕидови наскоро да не бидат „украсени“ со истите божествени чкртаници, надгледувајте го вашето малечко додека создава. Можете да му одредите место за цртање, нека тоа биде во неговото омилено столче на масата.
Кога детето ќе изгуби интерес за овој вид на забава, тргнете го приборот надвор од неговиот дофат. Боичките расфрлани низ куќата навистина не се она што ви треба!
- Учете песнички
Рецитирајте му песни на вашето малечко. Нашата литература е полна со прекрасни детски песни кои сè уште ги воодушевуваат нашите најмали.
Детето ќе знае да повтори кратка песничка што се римува ако му ја повторите само неколку пати.
Ова е одлична вежба за развој на говорот
Исто така, обезбедете се со многу книги за деца и оставете го детето да ја избере онаа што сака да му ја читате.
Имајте трпение да го повторите тоа што е на сликата сто пати ако му треба и ќе видите дека следниот пат кога ќе ја земе книгата, најверојатно веќе ќе знае да ги именува сите предмети на сликите.
Не ја потценувајте нивната меморија!
- Направете мала работилница
Доколку просторот во вашата куќа или стан го дозволува тоа, направете посебен простор каде што вашето малечко ќе може да ги изведува своите „ремек-дела“. Ставете голем најлон на подот, а работилницата снабдете ја со водени боички, хартии, пластелин и глина, ножици и лепила, но секогаш бидете спремни да поминете време со детето во работилницата за да не се повреди со некое од споменатите помагала.
Направете различни форми од пластелин, или уште подобро од глина, бидејќи тогаш имате простор за доработка – боење по избор. Дајте му на детето четка и нека се обиде да обои предмет од глина со водени бои.
