Во денешно време, децата се постојано изложени на слики и приказни за тоа што другите имаат – од нови телефони и облека, до патувања и скапи активности. Кога вашето дете ќе посака нешто што едноставно не можете да си го дозволите, или првпат одлучувате да му кажете дека нешто е прескапо, може да ви биде тешко да најдете соодветни зборови, а нему да му биде тешко да разбере што се случува.
Детето може да реагира на различни начини. Некогаш може да му биде сèедно и само ќе каже „ок“ и ќе продолжи понатаму. Но, реакцијата може да биде и побурна – „сите другари тоа го имаат“ или „сите одат, а јас не“. Можеби ќе имате среќа детето да го прифати „херојски“ и рационално, иако ќе му биде болно, но ќе го разбере вашето објаснување.
Еве неколку совети како да му пристапите на детето и да му објасните зошто не може нешто да добие.
Како да започнете разговор
Бидете искрени, но нежни
Наместо сложени финансиски објаснувања, користете едноставен јазик:
„Знам дека ти се многу допаѓа и би сакал/а да го имаш, но тоа сега чини многу пари и не можеме да си го дозволиме.“
Покажете дека ги разбирате неговите чувства
Реченици како: „Разбирам дека ти е тешко кога гледаш дека другите тоа го имаат“
му помагаат на детето да знае дека го слушате и дека неговите емоции се важни.
Насочете го разговорот кон она што го имате
Подсетете го детето на убавите нешта и активности што се достапни, за фокусот да се помести од она што му недостасува кон она што го има.
Можно однесување на детето и како да реагирате
Некои од реакциите ги спомнавме погоре, но еве уште:
- Тага или разочарување
Прифатете ја емоцијата без да ја намалувате:
„Знам дека си тажен/а и тоа е во ред. И јас би била тажна ако многу сакам нешто, а не можам да го имам.“ - Лутина или бунт
Останете смирени и повторете ја пораката без кавга. Покажете дека сте подготвени да разговарате кога ќе се смири. - Повлекување во себе
Ако се повлече, немојте веднаш да го терате на разговор – понудете му подоцна можност да се отвори преку игра или заедничка активност.
Како да му помогнете на детето да се носи со споредувањето со другите
- Разговарајте за реалноста на социјалните мрежи и „изгледот“
Објаснете дека не ја гледаме секогаш целата приказна – некои можеби имаат повеќе, но и тие имаат свои предизвици што не ги гледаме. - Учете го за вредноста на парите
Едноставни игри или договорено собирање пари за помала желба може да помогне детето да разбере како се штеди. - Градете чувство на вредност надвор од материјалното
Пофалете го трудот, добрината, креативноста – особини што не се поврзани со тоа што го поседува.
Детето најмногу ќе запамети како сте му се обратиле, а не самото нешто што не го добило. Љубовта, поддршката и отворениот разговор може да изградат отпорност која ќе му помогне и во идните разочарувања. А колку и да ги чуваме децата, разочарувањата ќе бидат дел од животот.
