Обезноста е се позастапена кај децата, иако експертите постојано предупредуваат за последиците што поради тоа, може да ги има врз здравјето на децата. Но, што треба да прават родителите чии деца имаат прекумерна тежина или се обезни?
Она што е сосема сигурно е дека кај децата не би требало да се применуваат никакви рестриктивни диети, ниту да се прават драстични промени во исхраната без консултација со лекар.
Прочитајте што всушност можете да направите за да му помогнете на вашето дете да ги изгуби вишокот килограми и да направи чекор кон подобро здравје.
- Внимавајте на исхраната
Децата не смеат да држат диети (освен во случај на некои здравствени проблеми, но тогаш исхраната ја пропишува стручно лице). Она што можете да го направите е на детето да му понудите разновидна храна, квалитетна и во разумни количини.
„Подобро е да јадете сите заедно, семејно, полека. Важно е да седите на маса најмалку 20 минути за стомакот да има време да му испрати на мозокот порака за ситост“, предлага д-р Блондин Мелуе-Фор од францускиот Центар за превенција на обезност кај децата.
Исто така, нејзиниот совет е храната да не е премногу мрсна, солена, да нема многу шеќер, како и оброците сами да ги подготвувате, а да избегнувате на детето да му давате брза храна. Освен тоа, обрнете внимание на скриените шеќери, кои се додаваат, на пример, во сокови, јогурти со вкус и слично.
Д-р Мелу-Фор советува никогаш да не го наградувате вашето дете со храна, ниту пак да користите храна како компензација или лек за нешто.
„Да се дава повремено чоколадо или сладолед е во ред. Но, ако тоа стане награда, тоа лошо влијае на односот на детето со храната и ја поттикнува зависноста од слатки кои немаат никаква хранлива вредност“, предупредува таа. Нејзиниот совет е наместо слатки наградата да биде игра фудбал, одење во парк или играње некоја друштвена игра, во зависност од тоа што му се допаѓа на детето.
- Погрижете се да има некоја физичка активност
Покрај здравата, урамнотежена исхрана, се препорачува детето да има и физички активности секој ден. Без разлика дали тоа е пливање, фудбал, танц, гимнастика, атлетика, тенис… Има толку многу спортови, обидете се да најдете таков во кој вашето дете ќе ужива.
Покрај тоа што физичката активност добро влијае на здравјето и тежината на децата, таа им помага и да го ослободат стресот, ги подобрува когнитивните способности, ги учи тимскиот дух, помага во градењето пријателства…
- Ограничете го времето поминато пред екранот
Многу родители не сфаќаат колку време детето всушност поминува пред екраните дневно, а тоа ја поттикнува потребата за грицкање и негативно влијае на сонот. Препораките на експертите се децата до три години воопшто да не се изложуваат на екрани, од три до шест години да не користат екрани повеќе од 20 минути дневно, од шест до осум години. околу половина час дневно, 45 минути од осум до десет години, додека децата деца над десет години можат да поминат околу еден час дневно пред екрани.
Кога станува збор за обезноста, не се работи за тоа што екраните директно поттикнуваат прекумерна тежина, туку едноставно го „крадат“ времето што би можеле да го трошат во игри, физичка активност…
- Погрижете се да спие доволно
А спиењето е важен елемент и на развојот на децата и на нивната (не)здрава телесна тежина. Имено, во текот на ноќта телото произведува лептин, хормонот на ситост, што значи дека доколку детето не спие доволно, ќе биде погладно и поуморно, а како резултат на тоа ќе има помала желба за движење.
Ако се земе сето ова предвид, јасно е колку е важно да се одржува здрав и редовен ритам на станување, легнување, оброци и физички активности.
Ако одлучите да ги промените навиките на вашето дете за да ја доведете неговата телесна тежина на здраво ниво, бидете трпеливи и обидете се да не ги воведувате сите промени одеднаш, туку постепено, за да не биде преголем шок за детето.
