Ако ви е тешко да го наговорите детето да проба нова храна, овие совети би можеле да ви помогнат – но бараат трпение и доследност. Некои деца обожаваат брокула и прокељ, додека други не сакаат да јадат ништо што не е слатко. Без разлика на навиките на вашиот „избирач“, убедувањето да проба нешто ново знае да биде исцрпувачко.
Децата сами одлучуваат што ќе јадат – а што не
Ако сте несигурни околу исхраната на вашето дете, знајте дека тоа е сосема нормално, вели Марина Чапаро, експертка за педијатриска исхрана. Она што често го нарекуваме пребирливост е типично за одредена возраст – фаза во која децата ја потврдуваат својата независност така што сакаат сами да одлучуваат што ќе јадат, а кон новата храна природно се претпазливи.
Сè додека нудите здрави опции, вие сте ја завршиле својата улога, вели Чапаро:
„Родителите се тие што ги обезбедуваат оброците – вие купувате и подготвувате храна. Но на крајот детето одлучува дали ќе јаде.“
Овој пристап некогаш им е тежок на родителите, особено ако пораснале со правилото дека „чинијата мора да се изеде до крај“, па затоа се потребни трпение и упорност.
- Дозволете му на детето да си игра со храната
Ако сте се соочиле со пребирливо дете, вечерата понекогаш може да личи на бојно поле. Но напредок не значи дека храната мора веднаш да заврши во устата. Ако детето го допира зеленчукот, го кине со прсти или го мириса, тоа веќе се запознава со изгледот и текстурата.
Истражување од Универзитетот во Источна Финска покажало дека децата од предучилишна возраст кои имале можност да „работат“ со овошје и зеленчук – да готват, печат, одгледуваат или учат за храната преку книги и игри – почесто ги избирале овие намирници. Вклучете го детето и дома: нека планира неделен мени, избира намирници во продавница и помага при готвење.
- Бидете трпеливи
Чапаро советува оброкот да биде балансиран – половина од чинијата нека биде овошје и зеленчук, а другата половина протеини и житарки или скроб. Новите намирници воведувајте една по една, заедно со две што знаете дека детето ќе ги изеде. Наместо да се нервирате, храната што ќе ја одбие, едноставно понудете ја повторно во некој од следните оброци.
Истражувањата покажуваат дека малите деца полесно прифаќаат нов зеленчук откако ќе им биде понуден повеќе пати. „Не сакате да бидете ‘полицаец за храна’“, вели Чапаро. „Постојаното опоменување може да создаде негативен однос кон јадењето.“
- Воведете ротација
За детето да се навикне секој ден да јаде нешто различно, не нудете иста храна два дена по ред, советува Дина Роуз. „Вчера за ручек јадеше морков. Денес можеш карфиол или грашок, а утре пак морков ако сакаш.“
- Почнете со мали количини
Многу родители нудат преголема порција нова храна, вели Кит Е. Вилијамс, директор на програмата за исхрана во Медицинскиот центар Пен Стејт Херши.
„Обично почнуваме со парчиња толку мали што буквално можете да ги дувнете.“
Пробајте со едно зрно грашок, мало парче тестенина или трошка сирење. Охрабрете го детето со зборови: „Ова е лесно – готово си за секунда.“ Откако ќе го изеде новиот залак, понудете му храна што ја сака. Со текот на времето зголемувајте ја количината на новата храна.
- Бидете искрени за состојките
За довербата е важно да не криете што има во храната. Ако детето праша што е зеленото во смутито, кажете дека е спанаќ. Ако реагира со „Фуј!“, смирено одговорете: „Сега знаеш што има внатре. Ајде да видиме како изгледа.“ И покажете му лист спанаќ.
- Изберете го вистинскиот момент
Иако се вели дека детето треба да проба нешто 10 до 15 пати пред да му се допадне, со текот на времето станува полесно. Наместо за ручек или вечера, кога оброкот може да пропадне за сите, новата храна понудете ја за ужина.
- Ограничете грицки и пијалаци меѓу оброците
Децата што постојано грицкаат или пијат често не се гладни за главниот оброк. Кога семејствата воведуваат ред – три оброци и една до три ужини по распоред – децата стануваат поотворени за нови вкусови. Истото важи и за пијалаците.
- Ужина послужена на послужавник
Некои деца се преоптоваруваат од полна чинија. Затоа нутриционистите препорачуваат храната да се послужи во неколку мали садови на послужавник. Така нема притисок што точно треба да се изеде, а децата полесно пробуваат по малку од сè.
- Искористете го влијанието на врсниците
Никој нема поголемо влијание од пријателите. Истражување покажало дека децата почесто пробале манго кога виделе дека го јаде нивен врсник. Понекогаш е доволно друго дете да земе парче брокула.
- Поттикнете разговор за време на оброкот
Кога фокусот ќе се префрли од тоа „кој што изел“ на разговор, оброкот станува попријатен. Поставувајте забавни прашања или сменете ја локацијата – пикник во парк или вечера на подот во дневната соба.
- Останете смирени
Некои деца уживаат во вниманието што го добиваат кога одбиваат храна. Колку сте порелаксирани, толку е поголема шансата детето навистина да проба.
- Бележете го напредокот
Фотографии или видеа од успешни обиди можат да му помогнат на детето да се сети дека новата храна всушност му се допаднала.
- Пробајте поинаков пристап
Понекогаш се користи пасирање на храната за да се олесни прифаќањето на нов вкус. Со време, текстурата постепено се згуснува.
- Фокусирајте се на вкусот
Не сите пребирливи деца сакаат блага храна. Некои претпочитаат поинтензивни вкусови или крцкава текстура. Прилагодете ги зачините според нивните преференции.
- Надградувајте го успехот
Од омилената храна постепено преминувајте кон слична. Ако детето сака пилешки медалјони, полесно ќе прифати друга форма на пилешко отколку сосема нова намирница.
„Не брзајте“, советуваат експертите. Со време и трпение, за неколку месеци можете да имате дете што се храни поразновидно и поздраво.
