Секојдневно во организмот преку храната и пијалоците внесуваме одредена количина на течности, а истовремени одредена количина и губиме. Односот помеѓу внесот и губењето главно е избланасиран. Но, во одредени состојби може да дојде до недоволен внес или поголем губиток на течности. Тогаш доаѓа до дисбаланс во организмот и состојба која се нарекува дехидратација.
Губење на поголема колчина на течности се јавува при повраќање, пролив (дијареа), преголемо потење ( за време на зголемена телесна температура, физичка активност, високи надворешни температури) и зачестено мокрење кај дијабетичари.
Бебињата и малите деца послено дехидрираат во однос на поголемите деца, поради побрзото губење на релативно поголеми количини течности. Кај децата најчеста причина за дехидратација се вирусните инфекции, кои предизвикуваат пролив, повраќање, висока температура и намалена желба за внесување на храна и течности.
Дехидратацијата може да биде блага, умерена и тешка во зависност од количината на изгубената течност.
Како да се препознае?
Симптоми се: силна жед, сува уста, сув и обложен јазик, црвенило на лицето, сува кожа, малку или нималку солзи за време на плачење, главоболка, темна и погуста урина, намалена потреба за мокрење, запек или тврда столица, поспаност и замор, темни подочници, забрзана работа на срцето, грчеви во рацете и нозете, намалено потење, мачнина, повраќање и мускулна слабост.
Кај бебињата е значајна и појава на вовлечена фонтанела. Кај тешка дехидратација која може да доведе до напади, кома и смрт, потребна е итна медицинска помош, а нејзини симптоми се екстремна жед, вртоглавица, низок крвен притисок, запек кој трае неколку дена, грозница, несвестица и губење на потребата за мокрење.
Кога на лекар?
Кога детето одбива да пие рехидрационен раствор, не престанува да повраќа, не се опоравува или дехидратацијата е се потешка и покрај вашите обиди, кога во содржината што детето ја повратило или во столицата има траги на ккрв, детето повраќа содржина со зелена боја, има силни болки во стомакот и кога проливот трае подолго од 10 дена.
