Кога бебето има жолтица, кожата станува жолта. До ова доаѓа поради билирубинот, супстанца што се наоѓа во крвта. Црниот дроб е органот преку кој се исфрла вишокот билирубин, но кај бебеињата, бидејчи органите се уште не се зрели, се случува некогаш тоа да не го направи доволно брзо.
Верувале или не, тоа се случува кај речиси секое второ дете. Иако е сосема нормално и состојбата се враќа во нормала за 2-3 недели, понекогаш нивото на билирубин е премногу високо. Во таква ситуација, ако е потребно, се прават третмани со кои се намалува нивото на билирубин во крвта.
ЗОШТО ДОАЃА ДО ЖОЛТИЦА?
Покрај тоа што ова се јавува поради незрелост на органите, може да постојат и дополнителни причини кои предизвикуваат жолтица.
- Бактериски инфекции
- Предвремено раѓање
- Проблеми со крвта, како абнормалности на црвените крвни зрнца
- Неусогласеност на крвните групи на мајката и бебето
- Проблеми со црниот дроб
КАКО ДА ПРЕПОЗНАЕТЕ ЖОЛТИЦА?
Главниот симптом е жолтеникава боја на кожата, но и на очите. Најдобро се забележува под интензивна светлина. Кај децата со потемна боја на кожата ова потешко се забележува. Вообичаено жолтилото прво се јавува на лицето, а потоа се спушта на долните делови од телото.
Бебето, покрај тоа, може малку повеќе да спие и потешко да се буди, а може да дојде и до проблеми при хранењето.
Многу ретко се случуваат и промени во столоицата. Кај некои бебиња се случува да биде во светло кафеава, со боја на песок. И урината може да ја промени бојата и да стане малку потемна.
КАКО СЕ ЛЕКУВА ЖОЛТИЦАТА КАЈ БЕБЕ?
Всушност, наједноставното решение може да биде засилено хранење на бебето. Треба бебето да се храни почести и на тој начин, вишокот билирубин ќе се исфрли. Лекарите понекогаш може да препорачаат и фототерапија, односно користење на светлина за лекување.
