Осипот кој може да се појави кај децата од најразлични причини, е вознемирувачка состојба за родителите. Реакцијата на кожата може да е предизвикана од минливи и несериозни по здравјето причини, но истовремено може да укажува на сериозни состојби кои треба на време да се препознаат и да се третираат од страна на стручно лице.
ПРИЧИНИ ОД КОИ МОЖЕ ДА СЕ ЈАВИ ОСИП
Причините и механизмите за појава на осип кај децата се бројни, а многу честа причина се инфекциите, кои ги следи висока телесна температура. Некои инфективни осипи, особено заразните, имаат типична клиничка слика и лесно се препознаат. Со оглед дека децата се вакцинирани со задолжителната програма за поголем дел на детски заразни болести, можноста да станува збор за ваков тип на осип е сведена на минумум. Кај останатите инфекциски осипувања клиничката слика е многу шаренолика и со причина се јавуваат дијагностички потешкотии.
Инфективните осипи се јавуваат при три групи на болести:
- Осип за време на вирусни болести кои главно се благи и самоизлечиви болести
- Осипи во состав на бактериски, габични и паразитски болести
- Осипи посредувани од имунолошките механизми
Осипот се разликува според клиничкиот изглед и се дели на макулопапулозен осип (дамки, јазли), еритематозен (еритем – ограничено црвенило на кожата), везикулозен осип (ситни меурчиња исполнети со течност) и патехијален осип (ситно, точкасто крварење во кожата со размер од 1 до 3 милиметри).
Од наведените видови осипи најмногу загрижува појавата на патехијален осип со висока телесна температура кога е потребен итен клинички преглед поради тоа што овој осип може да се појави во состав на менингитис или сепса. Меѓутоа, патехијалниот осип може да се јави и за време на вирусни инфекции, особено при ентеровирусни инфекции. Во тие слуачи најважно е, општата состојба на детето да е добра, а лабораториските параметри на воспалението укажуваат на благ тек на болеста.
Кај децата се доста чести и дерматомикози, односно болести на кожата, скалпот и ноктите кои се предизвикани од габи, а меѓу најчестите е микроспоријата, при што извор на инфекцијата главно е заразена мачка.
Од инфективни предизвикувачи на осип треба да се спомене и сврбежот кој се пренесува со близок контакт, со избивање на проширени папулозни промени кои многу чешаат. Станува збор за заразна болест која се појавува со пренос на инфекцијата на хуман тип на грини Sarcoptes scabiei.
Осипот може да биде последица и на алергиска пречувствителност на некоја храна или лекови, која најчесто се манифестира со уртикаријален Осип, но можние се и други форми на осип на кожата.
Додека за акутниот осип на уртикарија најчести причинители се храната, конзервансите, лековите или убод од инсект, кај хроничните форми на уртикарија дури 50% се идиопатски, за кои не може да се утврди вистинскиот причинител за болеста.
Освен со уртикаријален осип, алергискиот исип кај децата може да се презентира со различни клинички форми, а најчеста е појавата на атописки дерматитис, кој се јавува кај дури 20% од децата во предучилишна возраст.
Од друга страна, макулопапулозниот осип може да се јави и по засилено потење за време на летните месеци или премногу топло облекување без разлика на годишното време, кога доаѓа до запушување и воспаление на каналите на потните жлезди.
