Заморот и непреспиените ноќи се нормална појава кај родителите кои имаат бебе. Мајките речиси секогаш во тој период се хронично ненаспани, што пак може да претставува основа за појава на постпородилна депресија.
Можеби немате навика да спиете во текот на денот, но после раѓањето на вашето дете, сигурно дека таа навика ќе се промени и вие ќе можете многу лесно да заспиете во било кое време во текот на денот, поради хроничниот замор кој постојано ќе го чувствувате.
Затоа обидете се да спиете кога и вашето бебе ќе спие, без разлика дали тоа е неколку минути или пак неколку часа.
Тие неколку минути или пак часови одмор многу добро ќе му влијаат на вашиот организам т.е на вашето тело. Вашите обврски оставете ги за периодот кога сите ќе бидат будни.
Не заборавајте – бабите, сестрите и пријателките во првите неколку месеци се од голема помош за младата мајка. Тие можат многу да ви помогнат во секојдневните обврски, да го нахранат бебето, да го пресоблечат и да внимаваат на него.
Исто така и партнерот треба активно да биде вклучен околу чувањето на бебето. На пример, во текот на ноќта тој да стане и да го донесе бебето кај мајката, а после доењето да го однесе во неговото креветче и да го успие, да помогне кога бебето ќе има грчеви во стомакот, кога ќе му раснат заби и слично.
