Тоа блажено чувство на гордост дека во вашето тело се раѓа нов живот, во еден момент ја пресекува болката по должина на грбот. Што се случува? Болките во грбот за време на бременоста, особено во раниат фаза, се последица на природните процеси во текот на бременоста. Имено, лигаментите во нашето тело природно стануваат помеки и се истегнуваат за да не подготват за породување. Ова може да ги оптовари зглобовите на долниот дел на грбот и карлицата, што последователно предизвикува болки.
Истражувањата дефинирале повеќе фактори кои исто така доведуваат до овие непријатности.
Хормонални промени: За време на бременоста, женското тело (јајчниците и плацентата) произведува повеќе од хормонот релаксин, кој влијае на мускулно-скелетниот систем со „опуштање“ на лигаментите во карлицата. Релаксинот може да влијае и на лигаментите кои ги поддржуваат зглобовите во долниот дел на грбот, колковите, колената и глуждовите.
Зголемување на телесната тежина: За време на здрава бременост, жената се здебелува во просек од 10 до 15 килограми. Ова создава дополнителен товар на ‘рбетот. Исто така, бебето кое расте врши притисок врз долниот дел на грбот, сакрумот, карлицата и нозете и ги оптоварува нервите и снабдувањето со крв во тие области. Сето тоа, на крајот, предизвикува болки во мускулите на долниот дел на грбот и задникот, бутовите и стомакот.
Постурални промени: Фронталното зголемување на телесната тежина за време на бременоста може да го навалува центарот на гравитација на жената напред. Поради ова се зголемува кривината во долниот дел на грбот, поради што трудницата почнува да оди поинаку (на пример, има поширок став и одење), што последователно доведува до промена на лакот на стапалото.
Како да спречите болки во грбот за време на бременоста?
Грижете се за вашите стапала: Обидете се да не носите чевли со слаба потпора на лакот, како што се потпетици или рамни. Некои жени носат компресивни чорапи за да спречат собирање крв во нивните нозе.
Внимавајте на вашето држење: Мускулите на грбот се под голем притисок кога носите бебе, затоа погрижете се да не седите свиткани. Ако треба да седите подолго време, потпрете го долниот дел од грбот со перница и потпрете ги нозете на посебна потпора. Ако, пак, стоите подолго време, потпрете се со едната нога на стол или кутија или користете потпорен појас за трудници. Кога спиете на страна, поставете перница помеѓу колената за да го намалите стресот на долниот дел на грбот.
Подигање предмети: Не глумете супер жена – побарајте помош кога треба да кренете нешто. Ако нема никој наоколу и предметот е тежок, обидете се да не се наведнувате напред од половината. Наместо тоа, пријдете кон предметот, свиткајте се во колената и останете во чучната позиција, така што грбот ќе ви биде исправен.
Вежбајте: Секогаш посоветувајте се со вашиот лекар, но многу вежби се безбедни за правење за време на бременоста, вклучувајќи пливање, возење велосипед и јога за бременост.
Нормално е да се појават бројни промени на и во телото на жената за време на бременоста, но не само физички, туку и психолошки. Сепак, постојат и многу многу ефикасни начини за ублажување и избегнување на секаква непријатност. Уживајте во вашата блажена состојба, разгалете се на секој начин бидејќи вие и вашето бебе го заслужувате тоа, а ако не можете да си помогнете, задолжително побарајте помош од други.
