Многу долго се сметало дека дијабетесот тип 2 го добиваат само возрасните. Сепак, оваа болест станува се почеста во светот, а се јавува и меѓу децата.
Седечкиот начин на живот и нездравите навики во исхраната се најчестите причини за развој на дијабетес кај децата. Како родители, мора да се погрижиме нашите деца да имаат подобри навики, да бидат физички активни и да се хранат добро, за болестите од овој тип да не се развиваат во рана возраст. Дијабетесот тип 2 се јавува кога телото веќе не реагира правилно на инсулин. Во крвта тогаш се зголемува нивото на шеќер, а тоа влијае на сите други органи. Дијабетесот тип 2 потенцијално може сериозно да му наштети на телото.
ШТО ДОВЕДУВА ДО ДИЈАБЕТЕС ТИП 2?
Обезност (прекумерна телесна тежина): Обезноста носи инсулинска резистенција, која потоа се развива во дијабетес тип 2.
Недоволна физичка активност. Денес децата, особено во времето на пандемијата, се повеќе се насочени кон телефони и други екрани и на тој начин седат повеќе. Ваквиот начин на живот е многу погоден за развој на инсулинска резистенција.
За време на пубертетот доаѓа до голем број на хормонални промени, особено кај девојчињата, што дополнително, со сите овие промени, може да го поттикне развојот на дијабетес.
КОИ СЕ РИЗИК ФАКТОРИ ЗА ДИЈАБЕТЕС ТИП 2 КАЈ ДЕЦАТА?
- Историја на дијабетес во семејството
- Дете чија мајка имала гестациски дијабетес
- Обезност и седечки начин на живот
Дали промените во начинот на шивот можат да го намалат ризикот?
Родителите треба да обрнат внимание на исхраната и физичката активност на детето. Ова е од големо значење, бидејќи со позитивни промени го намалуваме ризикот од развој на оваа болест. За да ги охрабрите децата, бидете им пример. Грижете се за сопствените навики за да ги охрабрите.
Еве неколку начини:
- Пијте повеќе вода и избегнувајте сокови
- Вклучете повеќе зеленчук и овошје во исхраната
- Не инсистирајте детето да јаде повеќе отколку што сака
- Послужете му помали порции на детето
- Почесто шетајте со децата
- Поттикнете го детето да се занимава со спорт
- Децата нека бидат активно барем еден час, секој ден
