Вашето дете е на кревет, лежи со телефон или со таблет во рацете и постојано вратот го држи искривен. Да, оваа слика им е позната на сите родители.
И пред пандемијата со новиот коронавирус, студија покажа децата минуваа околу 33 часа неделно користејќи различни екрани. Оваа позиција, во која главата е комплетно искривена надолу на децата им е станата речиси природна состојба.
Навиката може да се задржи многу долго, дури и во текот на целиот живот, и затоа е многу важно да се спречи оваа лоша положба. Издвојуваме три начини за јакнење на мускулите на вратот кај детето.
- Започнете го денот со вежби
Потребни се само пет минути наутро, кога детето ќе стане од спиење. Застанете во положба на колена со рацете поставени паралелнол. Истегнете го ‘рбетот заедно со вратот и главата нагоре, а потоа на обратната страна. Може детето и да си игра – со носот да прави кругови по ѕидот додека стои или пак додека лежи кажете му да исцртува исти кругови (замислени секако) на таванот.
- Прилагодете ја положбата
Кога детето користи телефон или таблет, објаснете му дека треба телефонот да го доближи до главата, а не главата до телефонот. Покажете му со пример како да го направи тоа. Ако седи на маса, мониторот нека му биде во висина на очите, а тастатурата и лактите да бидат рамно поставени. Стапалата нека бидат поставени рамно на подот. За промена на навиките во секојдневните положби на телото навистина е потребно многу време и трпение. Не го заборавајте тоа.
- Вежбајте правилно седење
Повеќето столици со својата висина не се прилагодени за деца. Затоа обидете се да ги прилагодите така како што ним ќе им одговара. ‘Рбетот тогаш полесно ќе се постави во природна позиција. Можете и сами да му дадете пример на детето како да седи на предниот дел на столицата и така да ги опушти рамениците.
