Постојат безброј начини на воспитување деца, а повеќето родители сакаат да ги насочат така што еден ден ќе бидат горди на нив. Сепак, важно е да се има предвид дека секое дете е различно и дека она што одговара на едно семејство не мора да одговара на друго. Во тоа и лежи убавината на родителството – го запознавате своето дете, откривате што функционира, а што не, и учите од другите.
Ништо не може да се спореди со гордоста што ја чувствува родителот кога неговото дете ќе постигне нешто посебно.
Но, како да се воспитаат успешни деца? Експертите велат – треба да се почне рано. Кејти Хирш Пасек од Универзитетот Темпл и Роберта Голинкоф од Универзитетот Делавер објаснуваат како родителите можат да го поттикнат развојот и учењето кај децата.
Д-р Хирш Пасек истакнува дека начинот на кој денес ги воспитуваме децата е пресуден за нивната иднина. Според авторките, клучот лежи во шест важни вештини на кои родителите треба да работат.
- Соработка
„Соработката е сè – од согласување со другите до контрола на сопствените импулси за да можете да се согласувате, а не, на пример, да оттурнете некого од лулашка“, вели Хирш Пасек .
Ова подразбира градење на разновидна и мултикултурна заедница, а поттикнувањето на овие вредности дома ќе се одрази и на однесувањето на детето надвор од домот.
Д-р Катрин Браун додава дека децата кои се отворени за учење не се плашат да поставуваат прашања и да признаат кога нешто не знаат. Разговорите во семејството, особено за време на оброци, можат да помогнат во развој на отворен ум и почитување на различни мислења.
- Комуникација
Говорот, пишувањето, читањето и слушањето се основни форми на комуникација што децата треба да ги совладаат.
Семејната советничка Ен Пирс истакнува дека ефективната комуникација е клучен дел од родителството. Ако таа изостане, лесно може да дојде до недоразбирања, лутина и фрустрација.
Од друга страна, кога комуникацијата е добра, родителите полесно ги изразуваат своите потреби, а врската со детето станува подлабока и исполнета со почит.
- Знаење (содржина)
„Знаењето се надоврзува на комуникацијата“, објаснува Хирш Пасек. За да можат да соработуваат и комуницираат, децата мора да ги совладаат основните јазични вештини, особено читањето.
Семејната советничка Џули Нисе нагласува дека читањето на децата го гради нивното самодоверба и ја зајакнува врската со родителите на начин што разговорот не може да го постигне.
Чувството дека некој целосно му се посветува на детето е непроценлив подарок.
- Критичко размислување
Оваа вештина бара од родителите да не им даваат само готови одговори на децата, туку да ги поттикнуваат самостојно да размислуваат.
„Ако сакате дете кое размислува критички, нема да го замолчите кога поставува прашања“, вели Хирш Пасек. Наместо одговори од типот „затоа што јас така велам“, важно е да се поттикнува љубопитноста и разбирањето на различни перспективи.
- Креативност и иновација
Оваа вештина значи користење на постоечкото знаење за создавање нешто ново.
На пример, ако детето сака музика, не е доволно само да пее – важно е да учи да свири инструмент, да истражува различни стилови и да создава сопствени идеи. Колку повеќе учи, толку покреативно ќе се изразува.
- Самодоверба
Самодовербата е неопходна за преземање ризици и постигнување успех.
Родителите можат да ја развијат така што ќе ги охрабруваат децата и ќе им дозволат да пробуваат нови работи уште од мали.
Сите овие вештини му овозможуваат на родителот не само да го подучува детето, туку и вистински да биде присутен во неговиот живот.
„Не сме против технологијата, но нагласуваме дека клучот за развој на овие вештини е интеракцијата помеѓу детето и родителот“, заклучува Хирш Пасек.
