Голем број мајки престануваат да дојат и велат: „Немам млеко“ или „Млекото ми беше ретко, недобро и наеднаш престана!“, „Детето ми е гладно и плаче“. Меѓутоа, заклучокот дека немаат доволно млеко мајките го прават врз основа на знаци кои не се сигурен показател за недостаток на млеко.
Што може да ве наведе на тоа да помислите дека немате доволно млеко?
- Детето често плаче
- Немирно е и не спие редовно
- Немирно е на дојката, не ја фаќа правилно дојката, брзо ја ослободува и плаче
- Често ги цица рачињата
- Некој од страна ви вели дека млекото не ви е добро, дека е воденесто или нема доволно
- Градите не ви се набрекнати
- Вие самите мислите или други ви сугерираат дека треба да доите по распоред, а не кога детето бара
- Се обидувате да измолзете млеко, но излегуваат само неколку капки
- Сметата дека детето е големо и му треба многу повеќе млеко
- Детето е премало и му треба повеќе млеко за да закрепне
- Не забележувате дека од градите млекото знае да тече само
- Детето сака долго и често да цица
НО ОВА СЕ ЗНАЦИ КОИ СУГЕРИРААТ ДЕКА СЕПАК ИМАТЕ МЛЕКО:
- Детето редовно мокри и има столица
- Менувате најмалку 6 или повеќе влажни пелени дневно
- Детето има 3 до 8 столици дневно (по првиот месец од животот бројот на столици може да се намали)
- Детето е будно, има добар мускулен тонус, добива на тежина, напредува и ја надраснува облеката
КОЛКУ ДЕТЕТО ДОБИВА НА ТЕЖИНА АКО ИМАТЕ МЛЕКО?
Во првите денови од животот, детето обично губи од 7 до 10% од родилната тежина. Тоа значи дека дете родено со тежина од 3,5 кг ќе изгуби до 350 г од првобитната тежина. Тоа е сосема нормално. Не грижете се, детето треба да ја надомести таа загуба во рок од 2 до 3 недели. По враќањето на изгубената тежина, детето во просек добива од 100 до 200 гр неделно (мерењето се прави неделно, а не секој ден). Детето ќе ја удвои родилната тежина приближно во 6-тиот месец од животот. Тоа значи дека детето кое е родено со тежина од 3,5 килограми ќе тежи приближно 7 килограми во 6-от месец од животот.
