“Немој да го допираш тоа, падна на земја, сега е валкано“. Чудно е колку оваа реченица е честа меѓу родителите во земјава, во споредба со било која друга западна земја, а особено што стравот на родителот во овој случај е непотребен, оти таквото нешто не може да му го загрози здравјето на детето.
Слично е и кога родителите, грижејќи се за здравјето на децата, претеруваат во претоплувањето. А, всушност е познато дека најдобар начин да се изгради имунитетот на детето е тоа да му се дозволи контакт со повеќе потенцијални извори на зараза – прашина, кал, песок, валкани раце…
“Денешните деца треба да се исчеличат. Ние како мали сме оделе боси, родителите не не пресоблекувале постојано, па дури и кога ќе се наводениме, ниту пак ни ги миеле рацете штом ги извалкаме. Западниот свет во однос на нас е многу полиберален по ова прашање“, вели педијатарот Дејан Јонев.
Тој вели дека денешните родители ги држат своите деца под стаклено ѕвоно и дека тоа не е воопшто добро. Нормално е родителот да сака да го заштити детето од се што може да му наштети, особено од бактерии кои предизвикуваат болести. Но, децата мораат да имаат контакт со бактерии, оти единствено така нивниот имунолошки систем ќе умее да ги препознае, а потоа и да ги уништи.
Примери кои може да се видат во зима во земјите како Шведска, Данска или Исланд, за многу родители кај нас е непоимливо. Редици колички за бебиња се наредени на тротоар пред кафуле или ресторан, додека надвор вее снег или дува ветар, се нормална појава во овие земји. Додека родителите пијат кафе или чај, нивните деца спијат покриени на температури и под 0. И за попладневна дремка, тие количката со бебето ја изнесуваат на тераса, за да бебето не го пропушти дневното редовно челичење на остриот северен воздух. Зад оваа пракса стои популарното убедување дека престојот на свеж воздух ги прави децата поотпорни на вируси и настинки, а дека престојот во затворен простор не е здрав и ја зголемува можноста за зараза.
“Прва грешка која родителите ја прават е што ги презатоплуваат бебињата, оти мислат дека се склони кон настинки. Тоа е погрешно. Токму спротивното. Бебињата се чувствителни на претоплување. Не треба да се виткаат и дополнително да се покриваат, да им се облекуваат чорапи и да им се ставаат капи, особено ако се дома, а просторијата во која престојуваат не треба да биде потопла од 22 степени. Во спротивно, може да дојде до оштетување на терморегулациониот систем, поради што подоцна, таквото дете ќе биде зимурливо и склоно на настинки“, објаснува д-р Јонев.
Претерувањето во одржувањето хигиена може да доведе до пореметување на имунитетот на бебето и да допринесе за појава на алергии, астма и егзема. Секако, одржувањето на хигиената е важно, но тоа не значи дека треба да се живее во стерилна средина.
Современите средства за хигиена допринеле за искоренување на многу болесто, но ако се претерува со нивната употреба, средината во која живее детето станува тригер за настанување на имунолошки пореметувања.
