Првата година од животот на детето е многу интензивна и во овој период се случуваат најголемите промени. Сето ова, секако, влијае на сонот, а ние ви откриваме што се смета за нормално кога станува збор за спиењето на бебето, за да не се грижите непотребно.
Новородените бебиња спијат помеѓу 14 и 17 часа на ден, но се будат многу често, т.е. не спијат предолго. Исто така, толку мали бебиња сè уште не прават разлика помеѓу денот и ноќта во однос на спиењето.
На возраст од околу четири до шест месеци, бебињата обично почнуваат да спијат малку подолго во текот на ноќта – можат да спијат шест до осум часа и да дремнат неколку пати во текот на денот. Многу бебиња учат сами да се смируваат на оваа возраст и можат да заспијат без ничија помош, а на возраст од една година, на повеќето деца им требаат помеѓу 12 и 14 часа сон.
Како што рековме, новороденчињата спијат 14-17 часа на ден, но често се будат. Вообичаено е циклусите на спиење да траат помеѓу 50 и 60 минути, поради што малите деца често се будат, а околу половина од времето што го поминуваат со спиење е во РЕМ фазата, што е клучно за развојот на мозокот.
Она што е исто така вообичаено за првата година од животот се регресиите во спиењето, кои најчесто се јавуваат во четвртиот, осмиот и дванаесеттиот месец. Регресиите се привремени промени во спиењето, кои обично се случуваат кога детето стекнува нова вештина или заби. За родителите, регресијата на спиењето може да биде тешка бидејќи бебето плаче, често се буди, тешко заспива или целосно го менува времето на спиење, но добрата вест е дека тоа е само привремено.
Доколку, покрај промените во сонот, забележите и некои други симптоми, како што се прекумерна поспаност, проблеми со дишењето или јадењето, консултирајте се со лекар.
