Европа е на удар на топлотен бран, но малкумина разбираат како топлината влијае на телото. Едноставно кажано, човечкото тело тешко поднесува температури над 40 Целзиусови степени. Според британската Национална здравствена служба, нашите тела се трудат да одржуваат внатрешна температура од околу 37 степени Целзиусови, без разлика дали сме на снег или на топло. Меѓутоа, кога надворешните температури го надминуваат тоа идеално ниво, на телото може да му стане тешко да го запре зголемувањето на внатрешната температура.
Знак за загриженост се екстремни симптоми како конфузија, губење на свеста, напад, температура над 40 степени Целзиусови, брзо или неправилно дишење
Д-р Азмаин Чаудри на ТикТок објасни точно како телото се обидува да се олади и што се случува кога нема да успее.
„Кога телото ќе стане потопло, хипоталамусот му кажува како да реагира. Им порачува на крвните садови да се отворат за да ја испуштат топлината. Но, притоа опаѓа крвниот притисок, па срцето е принудено да работи понапорно за да пумпа крв низ телото. Ова може да доведе до вртоглавица, несвестица или паѓања ако намaлувањето на крвниот притисок предизвикано од топлина се случи премногу брзо“, рече тој.
Друг начин на кој телото се лади е преку потењето.
„Но, прекумерното потење доведува до губење течности и сол, менувајќи ја осетливата рамнотежа во телото што може да ги оштети бубрезите“, додаде тој.
И ако двете од овие функции не успеат, може да дојде до смртоносен топлотен удар. Состојбата може да влијае на секого, но оние над 75 години, бебињата и луѓето со долготрајни и сериозни болести се изложени на најголем ризик.
Знак за загриженост се овие екстремни симптоми:
- конфузија,
- губење на свеста,
- напад,
- температура над 40 степени Целзиусови,
- брзо или неправилно дишење.
Ако почувствувате кој било од горенаведените симптоми или ги забележите кај луѓе околу вас, веднаш повикајте брза помош. Ако не се лекува, топлотниот удар може брзо да ги оштети мозокот, срцето, бубрезите и мускулите, што доведува до смрт.
