Многу родители првата средба со своето дете ја опишуваат како љубов на прв поглед. И научниците денес потврдуваат дека промената што се случува во мозокот кога ќе добиеме дете е многу слична со онаа кога се заљубуваме. Ова обично е поизразено кај младите мајки, чии мозоци почнуваат да се менуваат веќе за време на бременоста.
Љубовта и грижата започнуваат со промени во мозокот
Докажано е дека промените се случуваат во различни делови на мозокот, сивата материја се згуснува, а мозочната активност се зголемува во областите одговорни за сочувство, анксиозност и социјални интеракции. Токму благодарение на овие промени, како и на напливот на хормони за време на бременоста и по породувањето, младата мајка е толку маѓепсана од своето бебе, а заедно со неописливата мајчинска љубов се јавуваат и силни заштитни пориви и постојана грижа.
Истражувачот на мозоци Пилјонг Ким вели дека во текот на првите месеци по породувањето, многу мајки покажуваат симптоми на опсесивно-компулсивно нарушување, како што се прекумерно миење раце или постојано проверување дали бебето дише.
“Во овој период мајките многу размислуваат за работи на кои навистина не можат да влијаат. Постојано размислуваат за бебето. Дали бебето е здраво? Болно? Сито? Во мозокот на жените, како и кај животните, се случуваат промени кои поттикнуваат силна желба да се грижат за своето дете“, вели Ким.
Неверојатната амигдала
Неколку меѓусебно поврзани региони на мозокот се одговорни за мајчинските чувства и однесување. Посебно место меѓу нив е амигдалата, кластер на неврони во облик на бадем поврзан со емоционални реакции како страв, анксиозност и агресија. Во нормален мозок, активноста во амигдалата се зголемува во неделите и месеците по раѓањето на детето.
Истражувачите веруваат дека овој раст на амигдалата, поддржан од коктел од хормони, е поврзан со однесувањето на младите мајки и ги прави исклучително чувствителни на потребите на нивните бебиња. Истражувањата покажаа дека активноста во амигдалата е поврзана со силните чувства на мајката за сопственото бебе, во споредба со другите бебиња.
