Родителите со прво дете често имаат проблем кога ќе се најдат помеѓу “два огна“, од една страна ги советуваат оние “кои имаат повеќе искуство“, од друга лекарите. Иако често се водат според сопствените инстикти, многу родители не се свесни дека прават “грешки“. Поради тоа ви претставуваме пет “заблуди“ во кои многу нови родители веруваат.
- Ако бебето е студено, ќе настине
Многу е лесно премногу да се грижите за тоа дали бебето ќе се разболи и ќе настине кога е ‘студеникаво’ – но, не плашете се, науката тврди дека тоа нема да се случи. Иако дури и некои истражувања сугерираат дека краткотрајната изложеност на постудено време може да го промени имуниот систем на поединецот, има многу повеќе докази кои го поддржуваат доброто облекување и поминато време на отворено. Затоа, само секогаш добро “завиткајте го“ вашето бебе и уживајте без грижа.
- На бебето му треба тишина за да спие
Сонот е скапоцен, особено кога сте родител за прв пат и хронично ви недостасува сон. Поради тоа и прекинувањето на сонот на бебето е нешто што ве ужаснува и може да биде многу примамливо да се обидете да создадете целосна тишина околу бебето. Меѓутоа, бебињата се навикнати да спијат во близина на бучава. Запомнете дека бебињата поминале девет месеци во стомакот на мајката во кој биле навикнати на звуци, а д-р Харви Карп тврди дека бебињата не само што се навикнати на звуци, туку и ги сакаат.
- Бебето треба да се забавува
Она што му треба на бебето не е забава, туку само ваше друштво. Новите родители не мора да дадат се од себе за да го окупираат своето бебе, доволно е да поминуваат време со бебето и да се поврзат со него. Притоа, поттикнувањето на самостојна игра, дури и од најрана возраст, е важна вештина што детето може да ја научи.
- Бебето мора да се капе секој ден
Родителите често се прашуваат колку често треба да го капат своето новороденче. Треба да се има предвид дека бебињата не се потат како и возрасните и немаат непријатен мирис, така што ним им е потребно капење секој втор или трет ден. Ако капењето сепак е дел од вашата секојдневна рутина, не заборавајте да ја хидрирате кожата на вашето бебе со соодветни препарати.
- Не е добро премногу да се гушка и гали бебето
Не постои нешто, како премногу милување и прегратка!. Напротив, гушкањето на бебето има огромни предности за развојот на мозокот, а едно истражување открило и дека бебињата кои се галени растат во поздрави деца, помалку се депресивни, пољубезни се и имаат поголема емпатија кон другите.
