Кашлицата многу често се јавува како симптом на разни болести, вируси, настинки кај децата. Може да звучи многу сериозно, но обично не е знак за паника. Освен тоа, кашлањето е здрав и важен рефлекс кој ги штити дишните органи во грлото и белите дробови.
Иако кашлицата генерално не е причина за прекумерна загриженост, важно е да се знае дека постојат различни видови, од кои некои може да се лекуваат дома, а за некои е потребно да отидете на лекар.
Кашлица како лаеж
Овој тип на кашлица најчесто е предизвикан од оток на горните дишни патишта. Главно се работи за отечено грло, грклан и душник, што особено им го отежнува дишењето на децата бидејќи вообичаено имаат мали дишни патишта.
Оваа кашлица обично започнува ненадејно, често сред ноќ, а кај повеќето деца е придружена со рапав звук при вдишување, пишува kidshealth.org.
Голема кашлица
Големата кашлица е инфекција предизвикана од бактерија, а оваа болест е позната по тоа што предизвикува напади на кашлање без пауза за детето да дише. Кога ќе заврши нападот на голема кашлица, детето зема длабок здив, при што се слуша звук на чкрипење. Уште некои други симптоми кои се јавуваат се течење на носот, кивање, и малку покачена температура.
Големата кашлица може да се појави во секое време, но најопасна е за бебињата под една година. Таа е многу заразна, а вакцината против голема кашлица е дел од задолжителната вакцинација во земјава и се започнува на возраст од два месеци.
Кашлица со свирење
Ако се слуша звук на свирење кога детето исфрла воздух, односно издишува, тоа може да значи дека долните дишни патишта и белите дробови се отечени. Ова може да биде случај кај астма или вирусна инфекција, бронхиолитис. Свирењето може да се слушне и кога дишните патишта се блокирани од некој предмет, на што треба да се обрне посебно внимание кај малите деца.
Ноќна кашлица
Во многу случаи, кашлицата се влошува ноќе. Кога, на пример, детето ќе настине, секрет од носот и синусите се слива низ грлото и е тригер за ноќно кашлање, што може да го наруши сонот на детето.
Астмата исто така може да биде поттик за ноќна кашлица бидејќи дишните патишта се почувствителни ноќе.
Дневна кашлица
Ладниот воздух или физичката активност може да ја влошат кашлицата во текот на денот. Внимавајте во домот да нема предизвикувачи кои би можеле да го иритираат детето кое кашла – освежувачи за воздух, миленичиња, чад…
Кашлица со температура
Дете кое кашла, а исто така има малку покачена температура и течење на носот, најверојатно има настинка. Меѓутоа, кашлицата со температура која надминува 39 степени може да укаже и на пневмонија, особено ако детето е исто така слабо и брзо дише. Ако ги забележите овие симптоми, веднаш посетете лекар.
Кашлица со повраќање
Децата понекогаш кашлаат толку многу што им предизвикува нагон за повраќање и ги тера да повраќаат. Исто така, дете кое има кашлица поради настинка или астма може да повраќа ако има многу секрет што се слева до стомакот и предизвикува гадење. Сепак, повраќањето предизвикано од кашлање обично не е причина за тревога, освен ако повраќањето не престанува.
Третман на кашлица
Дали ќе го однесете вашето дете на лекар зависи од многу фактори – колку долго ќе трае кашлицата, дали има други симптоми итн.
Во повеќето случаи, кашлицата е предизвикана од вирус и потребно е е едноставно да оди со свој тек. Понекогаш може да трае и две недели, а во зависност од тежината на симптомите може да се користат лекови за кашлица кои ќе ја ублажат, но нема да ја излечат причината за кашлицата.
Во секој случај, не му давајте на вашето дете никаков лек на своја рака и имајте на ум дека лековите за кашлица обично не се препорачуваат за деца под шест години.
Кога треба да посетите лекар
Секогаш јавете се на лекар ако детето кашла и:
- Има потешкотии со дишењето.
- Дише побрзо од вообичаено.
- Има синкава боја на лицето, усните или јазикот.
- Има висока температура (особено ако детето кашла и носот не му е затнат и не му тече).
- Има благо покачена температура и е помало од три месеци.
- Има помалку од три месеци, а кашлицата трае подолго од неколку часа.
- Се слуша свирење кога детето зема воздух по кашлањето.
- Искашлува крв.
- Се слуша звук на „свиркање“ кога вдишува.
- Малаксало и нервозно е.
- Дехидрирано е – знаци на дехидрација вклучуваат поспаност, сува или леплива уста, детето плаче без солзи, поретко уринирање или помалку влажни пелени.
