Во средината на ноќта, вашето бебе редовно се буди и плаче. И додека вие станувате по којзнае кој пат (и која ноќ) по ред за повторно да го заспиете детето, вашиот партнер само ќе се сврти на другата страна од креветот и продолжува да спие. Дали ви е позната оваа ситуација?
Научниците ги набљудувале навиките на 20.000 работно активни родители кои имаат мали деца за да откријат што точно се случува за време на познатата и омразена „ноќна смена“. И речиси во сите случаи, жената била таа која на плачењето на детето секогаш прва се будела. Ова и може да се разбере ако се земе предвид дека таткото работи, бидејќи мајката моментално е на породилно отсуство. Но, она што загрижува е што оваа практика продолжува и кога жената се враќа на работа – таа и понатаму станува неколку пати во текот на ноќта и покрај тоа што одамна престанала да го дои детето.
А дали е во прашање навика или мрзеливост на мажите, на тоа прашање научниците немале одговор. Но, податокот до кој дошле е поразителна – само 11 отсто од татковците се подготвени да станат среде ноќ за да му дадат млеко на своето дете, да го пресоблечат и смират. Мајките се пожалиле и дека, откако ќе го заспијат своето дете, често имаат проблеми повторно да заспијат, а не е реткост да и по еден час лежат будни во кревет додека повторно не ги фати сон, додека мажите немаат проблем со ова бидејќи им требаат помалку од пет минути за да се вратат во царството на соништата. Ако се земе предвид дека во текот на денот мајката е таа која покрај работата е поактивна со детето и со домаќинството, потребно е, доколку овој проблем ги мачи, да разговараат со партнерот и да им објаснат на нив дека им е тешко физички да го издржат ова темпо.
А работата е едноставна – договорете се која ноќ кој ќе стане за да може вашиот партнер да спие. Затоа што е важно да се подели работата за да можат и двајцата родители да уживаат во убавините на родителството.
