Досадно ми е. Колку пати сте ја слушнале оваа реченица од вашето дете? И дали ви се чини дека на денешните генерации деца им е досадно многу почесто отколку што беше случај со претходните генерации?
Не сте единствените ако ви се чини така, а и истражувања во кои учествувале родители покажало дека на модерните деца навистина често им е досадно. Како и многумина, веројатно се прашувате зошто е тоа така, а една од причините на која експертите укажуваат се екраните.
“Живееме во ера на технологија. И иако е лесно да се каже “децата денес не играат како порано”, тоа не е толку едноставно. Децата денес не играат како порано бидејќи денешните деца не живеат во истиот свет како претходните генерации”, посочува лиценцираниот социјален работник Гилијам Амодио.
Еве што уште велат експертите за ментално здравје за тоа зошто на децата им е здодевно и што да се направи во врска со тоа.
Досада кај децата и тинејџерите
Првото нешто што треба да го земете во предвид е возраста на детето и колку долго може да го задржи своето внимание на таа возраст.
„Во најмала рака, бројот на минути е еднаков на нивната возраст по два, а максимум бројот на нивната возраст е три пати“, вели детскиот психолог д-р Лесли Тејлор.
Ова би значело дека дете на возраст од три до четири години може да одржува опсег на внимание од шест до осум минути, помеѓу пет и осум години помеѓу 10 и 24, итн.
Во оваа смисла, родителите понекогаш се жалат дека на нивните деца им е „досадно цело време“, но всушност е сосема нормално двегодишно дете да не може да се фокусира половина час.
Значи, дали тоа е навистина досада или станува збор за нешто друго?
Експертите нагласуваат дека родителите треба да поминуваат повеќе време со своите деца, но за жал поради работата и многуте обврски кои ги имаат не секогаш се во можност да посветат време на своите деца колку што би требало и би сакале. Затоа понекогаш посегнуваат по екраните кои им ги даваат на своите малечки за да можат да прават други работи. Меѓутоа, тоа е еден од факторите што може да придонесе за чувството на досада кај децата.
„Иако ова е разбирливо, особено за зафатените родители, потпирањето на екраните може да создаде циклус во кој децата се навикнуваат на постојана стимулација, потенцијално намалувајќи ја нивната способност да се вклучат во независна, имагинативна игра“, вели психијатарот за деца и возрасни д-р Зишан Кан. „Употребата на екранот ненамерно може да придонесе за пократок опсег на внимание на детето и зголемено чувство на досада кога не е изложено на екрани“.
Како да им помогнете на децата
За да се намали здодевноста кај децата, стручњаците советуваат да ги поттикнете да играат и да направат нешто со рацете – исецкајте, сликајте, цртајте… бидејќи ваквите активности го задржуваат вниманието на малите многу подолго отколку пасивното зјапање во екран.
Исто така е корисно да се има дневна рутина, или одредено време за различни активности, бидејќи оваа предвидливост им помага на децата полесно да преминат од една активност во друга.
Поттикнете независна игра – дозволувајќи им на децата да играат самостојно, ги поттикнува да ја развиваат својата имагинација и да ги градат вештините потребни за решавање на проблемите.
