Според клиничките истражувања, умерениот внес на млеко за време на бременоста е поврзан со подобар тек на бременоста. Повеќето стручњаци препорачуваат кравјо млеко како најздрава опција за пиење во овој период. Тоа има најбогат нутритивен профил и содржи широк спектар витамини и минерали кои им се потребни и на мајката и на бебето, вклучувајќи калциум и витамин Д.
Доколку, пак, избегнувате млечни производи – поради интолеранција или личен избор – растителните млека можат да бидат добра алтернатива. Во продолжение дознајте повеќе за хранливата вредност на различните видови млеко, за да бидете сигурни дека внесувате доволно хранливи материи важни за здрава бременост.
Кравјо млеко
Повеќето експерти го препорачуваат кравјото млеко за време на бременоста бидејќи е богато со хранливи материи потребни за мајката и бебето во развој. Калциумот и витаминот Д се особено важни за изградба и одржување на здрави и цврсти коски. Кравјото млеко е богато и со протеини и есенцијални аминокиселини – градбени елементи на клетките на бебето.
Витаминот Д може да помогне во заштита од гестациски дијабетес, додека витаминот Е делува како антиоксиданс и штити од различни заболувања. Една чаша кравјо млеко содржи околу 285 мг калциум.
Доколку сакате да го намалите внесот на заситени масти, можеш да изберете обезмастено млеко. За време на бременоста треба строго да се избегнува сурово (непастеризирано) млеко и производи од сурово млеко, бидејќи можат да содржат штетни бактерии. Пастеризацијата ги уништува микроорганизмите преку загревање на висока температура, што го прави млекото безбедно за консумација.
Млеко од соја
Соиното млеко има речиси иста количина протеини како кравјото, а често е дополнително збогатено со калциум. Сепак, телото можеби нема целосно да го апсорбира калциумот бидејќи сојата содржи природни соединенија што ја намалуваат неговата апсорпција.
Ароматизираните растителни млека, вклучувајќи го и соиното, често содржат додадени шеќери, па затоа се препорачува да се избира незасладена варијанта. Од сите растителни алтернативи, сојиното млеко има нутритивен состав најсличен на кравјото, па некои стручњаци го сметаат за најдобра растителна замена за време на бременост. Антиоксидансите во сојиното млеко помагаат и во борбата против ракот. Една чаша соино млеко обезбедува околу 300 мг калциум.
Бадемово млеко
Ако си алергична на млечни производи или соја, бадемовото млеко може да биде добра алтернатива. Иако содржи помалку хранливи материи и протеини од кравјото млеко, природно има повисоко ниво на витамин А и калциум. Некои видови се дополнително збогатени со калциум и витамин Д.
Бадемовото млеко содржи фолна киселина, влакна, протеини, витамин Б, калциум, железо и витамин Е, а има и малку калории. Антиоксидансите што ги содржи придонесуваат за зајакнување на имунолошкиот систем. Една чаша бадемово млеко содржи околу 7,5 мг калциум.
Оризово млеко
Оризовото млеко е добра опција за лица со алергија на млечни производи, соја и јаткасти плодови. Има малку протеини, но значително повеќе јаглехидрати од кравјото млеко. Поради тоа не се препорачува за дијабетичари, бидејќи содржи и до четири пати повеќе јаглехидрати. Некои видови се збогатени со витамини А и Д.
Овесно млеко
Овесното млеко е уште една добра алтернатива за лица со алергии на млечни производи, соја и јаткасти плодови. Иако овесот природно не содржи глутен, индустриски произведеното овесно млеко често се преработува во постројки каде се обработуваат и житарки со глутен. Затоа, ако имаш интолеранција на глутен, внимавај на ознаката „без глутен“.
Овесното млеко има помалку протеини од кравјото, но повеќе јаглехидрати од повеќето други млека. Природно содржи железо, витамини од Б-групата и други важни витамини и минерали, а многу комерцијални варијанти се дополнително збогатени со калциум и витамини А и Д. Високата содржина на влакна помага во спречување на запек за време на бременоста.
