Бебињата знаат да ги изненадат родителите со нагло движење и пад, а тоа, по правило, се случува во ситуација: „Само за миг се свртев нешто да земам“. Следува силен плач на детето, а потоа и на мајката – што, се разбира, не е добро. Повеќето зачудени родители веднаш помислуваат на кршење на коските на черепот и тешка повреда на мозокот. За среќа, ова се случува исклучително ретко. Повеќето бебиња минуваат без сериозни последици од падот, а педијатрите тоа и го објаснуваат.
Која е критична висина за пад на бебето?
Може да се каже дека нема безбедна висина за паѓање, па најдобро е да не дојде до пад. Сепак, треба да се разграничат две важни “висински“ ситуации: пад од мала висина, значи од обичен кревет на кој се преповива бебето (обично се работи за 40 до 60 сантиметри од подот) и пад од поголема висина, поголема од еден метар – тоа се оние масички за пресоблекување кои вообичаено се во продолжение на креветчето или се одделен предмет.
За среќа, падовите од поголема висина се исклучително ретки, веројатно затоа што родителите се многу повнимателни кога го пресоблекуваат бебето на поголема висина.
Како изгледа бебе кое штотуку паднало?
Бебето веднаш силно заплакува – негодува што е на под, а првите десет минути по падот е плачливо и вознемирено. Тоа е сосема вообичаено, оти падот создава болка, но е и исплашено поради неочекуваната и непријатна промена на положбата. Уште и ако мама и тато се исплашат и заедно викнат со детето, настанува голема, обично непотребна паника. Повеќето бебиња по десетина минути стануваат расположени, весели и вообичено се однесуваат, па нема причина за загриженост.
Што треба да направат родителите ако падне бебето?
- Лесно и без паника, кренете го бебето од подот и прегрнете го, така што главчето да му биде лесно наведнато напред. На овој начин, ќе се избегне да во случај на повраќање, содржината на желудникот не се аспирира („вшмука“) во дишните патишта.
- Потоа, бебето треба да се сврти кон вас и внимателно да се погледне дали има повреди или крварење на главата, на усните или во устата. Нема потреба да се притиска и “препипува“ главата во потрага по скршени коски (ова е сосема бесмислено).
- Барем 20 минути, на бебето не му давајте да јаде и да пие. За тоа време, играјте со него, обидете се да заборави на траумата низ која поминало.
- Ако бебето се однесува како ништо да не се случило после 20 до 30 минути, треба да му се дадете да јаде, а ако сака да спие, слободно нека се одмори.
Што може да се повреди при падот?
Најчесто главата, што е сосема логично, бидејќи таа е најтешкиот дел од телото. Од друга страна, бебињата паѓаат од лежечка положба, без рефлексно пружање на рацете кон подот, така што главата едноставно се протегнува и удира на подот. Понекогаш, по неколку минути, можете да видите „чворга“ – што е, всушност, безопасен хематом (излевање на мала количина крв под површниот дел на коската на местото на ударот). Големината на чворгата не мора да е пропорционална со тежината на падот, па затоа не треба да и се дава големо значење. Коските на главата на бебето се исклучително еластични, така што посериозни повреди на коските се исклучително ретки. Обично страда челото или тилот, а поретко бебињата паѓаат на лице или „странично“. Тука нема некои значајни разлики во појавата на можни последици.
Што да се направи ако дојде до повраќање?
Кај бебињата ретко по падот, доаѓа до повраќање. Тоа може да се очекува е да ако имало оброк триесетина минути пред паѓањето, а понекогаш се случува и ако ударот бил многу силен. Затоа, нема причина за паника ако поврати 1-2 пати по падот – тоа е сосема вообичаено. Не е во ред кога бебето постојано повраќа и кога тоа е поврзано со негово чудно однесување.
Кога неодложно треба да се оди на лекар?
Се работи за многу ретки ситуации, но теба да се знаат. Во таков случај, треба без паника да се отиде до амбуланта каде има детски хирург или педијатар.
- Упорно повраќање што го исцрпува детето
Не е невообичаено бебе со благ потрес на мозокот да поврати еднаш или двапати. Но, ако тоа се случува во серии – бебето мора да се однесе на преглед.
- Кога ќе се случи да бебето удри во нешто остро или тврдо при падот и дојде до силно крварење
Тогаш е неопходно да се оди на лекар, но при транспортот треба со стерилна газа или чиста памучна пелена, да се притисне местото на крварење (така ќе се запре крварењето).
- Невообичаена поспаност, или наизменично изразена вознемиреност, па екстремна поспаност – детето многу чудно се однесува
Прегледот има за цел да го проучи невролошкото однесување на детето, а докторот има задача да исклучи или да се посомнева во најтешка компликација од тешки падови на глава – крварење во мозокот или од артериите од внатрешната страна на коската. Овие крварења (професионално наречени интракранијални крварења) се навистина опасни за бебето, но се исклучително ретки. Тие се почести кај новороденчињата, иако бројот на такви случаи е занемарливо мал, бидејќи бебињата ретко паѓаат случајно. Затоа, родителите не треба да се плашат однапред.
