![7](https://pedijatar.mk/wp-content/uploads/2024/07/7-9-696x522.jpg)
Бебињата треба да се заспиваат на грб, бидејќи тоа го намалува ризикот од ненадејна смрт на доенчиња, велат експертите. Ова го налагаат и официјалните препораки на Американската академија за педијатрија, поради што многу родители ги фаќа паника кога случајно ќе видат дека бебето среде ноќ се свртело од грб на стомак.
Кога бебињата можат да спијат на стомак? Препораките на Американската академија за педијатрија се дека бебињата треба да се заспиваат на грб најмалку 12 месеци или подолго доколку се предвремено родени бебиња. Меѓутоа, доколку детето за време на спиењето се сврти на стомак, а вие сте сигурни дека може да се врати и од стомак на грб, во ред е да му дозволите да спие во таа положба, пишува parents.com.
Еве што друго треба да знаете за позициите за спиење кога се во прашање бебињата.
Ризици од спиење на стомак
Во првата година од животот, пред бебињата да научат да се вртат од стомак на грб, не е безбедно да ги оставите да спијат во таа положба. Истражувањата покажале дека бебињата кои се заспиваат на стомак имаат двојно поголем ризик од синдром на ненадејна смрт на доенчиња отколку бебињата кои спијат во друга положба.
Поголем ризик за помладите бебиња
Иако ненадејната смрт на доенчиња може да се случи во секое време од првата година од животот на детето, во повеќето случаи таа се јавува кај бебиња на возраст од еден до четири месеци.
Кога мало бебе спие на стомак, постои поголем ризик од прегревање, вдишување премногу јаглерод диоксид и задушување, а сето тоа е поврзано со синдром на ненадејна смрт на доенчиња.
Патем, многу родители мислат дека спиењето на стомак е добра положба за бебињата бидејќи има помали шанси содржината да се аспирира во белите дробови ако подригнат додека спијат. Меѓутоа, вистината е сосема спротивна.
Поради положбата на душникот и хранопроводникот, бебињата кои спијат на грб имаат помала веројатност да ја аспирираат содржината што ја подригнуваат, велат експертите.
Од друга страна, ако бебето кое сè уште нема доволно контрола над главата спие на стомак со свртено лице, тоа претставува ризик од задушување.
Ако сè уште се прашувате кога е безбедно бебињата да спијат на стомак, експертите велат дека тоа е по првата година од животот. Нивниот совет е секогаш да го ставате вашето бебе да спие на грб во првите 12 месеци од животот, било во текот на денот или навечер. А ако бебето самото се врти на стомак, во ред е да го оставите така.
„Кога бебињата се доволно возрасни за слободно да се тркалаат напред-назад, тие можат да изберат да спијат на стомак и тоа е во ред“, вели педијатарот д-р Елизабет Мареј. „Клучно е детето да може само да дојде во таа положба и да се врати на претходната“, додава таа.