Ползењето е голема работа во бебешкиот развој, бидејќи тоа е прв чекор кон неговата независност и движење. Тоа на бебето му дава чувство нешто само да направи, што е важно за неговата самодоверба. Со ползењето, бебето открива нов свет, покмплексни движења, како стоење, одење, а со тек на време и трчање.
Ползењето е тешка работа за бебето, бидејќи истовремено треба да ги користи и мозокот и телото. Потребни му се моторни, визуелни и когнитивни вештини.
Прво, мускулите на грбот, вратот, рамената, рацете и абдоменот мора да бидат доволно силни да ја поддржат тежината и да помогнат во балансирањето. Исто така, и видот не бебето има значајна улога. Додека ползи, бебето го користи т.н. бинокуларен вид, со помош на кој двете очи се фокусираат на иста мета. Менатлните способности, како навигација и меморија, имаат клучна улога.
Бебињата обично почнуваат со ползење помеѓу 3. и 10. месец, иако има бебиња кои ја прескокнуваат оваа фаза и веднаш се подигаат на нозе.
На бебето може да му помогнете со ползењето така што ќе му обезбедите повеќе време на стомак. Во оваа положба, тоа ќе може да ја подига главата, да разгледува околу себе, со што го зајакнува вратот, рамената, рацете и трупот. Со шутирање со нозете во оваа положба, тоа ги јакне мускулите на нозете и колковите.
Ќе знаете дека бебето е наскоро подготвено за ползење, кога ќе почне да прави “склекови“, подигање на телото со раце. Полека оттаму ќе научи, да се подигне на раце и нозе. Потоа ќе почне да се клати напред и назад, а со тек на време полека ќе почне и да се движи.
