ПИШУВААТ:
Д-р Аманда Кокс, асистент професор по педијатрија,
Д-р Мајкл Пистинер, детски алерголог
♦♦♦♦♦♦♦
Многу родители имаат прашања и се грижат кога е безбедно да воведат намирници како јајца и путер од кикиритки во исхраната на своето дете. Иако овие намирници се вообичаени во исхраната, тие исто така се и меѓу оние кои најчесто предизвикуваат алергиски реакции.
Актуелни препораки за воведување на потенцијално алергена храна кај бебињата
Долги години експертите сметаа дека најдобриот начин за спречување на алергија на кикиритки е избегнувањето на производите од кикиритки во првите години од животот. Во тоа време се мислеше дека одложувањето на воведувањето можеби ќе го спречи развојот на други алергиски состојби, особено егзема. Сепак, поновите истражувања не открија никаква корист од одложување на воведувањето на алергена храна.
Бебињата добиваат сè што им е потребно за исхрана од мајчиното млеко, адаптираното млеко или комбинацијата од двете, сè до околу шестмесечна возраст. Тогаш најчесто се подготвени да ги пробаат првите залчиња цврста храна
Всушност, она што го откриваат овие понови истражувања е следново: штом вашето бебе е подготвено да почне со цврста храна, може да биде корисно да почнете да му нудите мали количини на намирници кои најчесто предизвикуваат алергии.
Рано воведување на кикиритки – трајна заштита од алергии
Во 2015 година, голема студија откри дека раното воведување на кикиритки – со продолжено, редовно сервирање – спречува појава на алергија на кикиритки кај бебиња со „висок ризик“ за нејзин развој (оние со тешка егзема и/или алергија на јајце). Поново истражување на истата група деца покажа долготрајна заштита. Студиите, исто така, открија заштитни ефекти и при раното воведување на јајца, како и со форми на млечни производи прилагодени за бебиња, како што е формула на база на кравјо млеко.
Како да започнете со воведување на алергена храна
Бебињата добиваат сè што им е потребно за исхрана од мајчиното млеко, адаптираното млеко или комбинацијата од двете, сè до околу шестмесечна возраст. Тогаш најчесто се подготвени да ги пробаат првите залчиња цврста храна. Откако вашето бебе ќе биде подготвено, еве неколку совети како да почнете со воведување цврста храна имајќи ги предвид алергиите на храна:
Започнете со неколку намирници со низок ризик од алергија, на пример, бебешка каша од житарки, пире од банана или пире од суви сливи. Давајте му на бебето по една нова намирница и почекајте најмалку еден ден пред да започнете со друга. По секоја нова намирница, следете дали има алергиски реакции, како што се дијареја, осип или повраќање. Ако се појави нешто од ова, престанете да му ја давате новата храна и консултирајте се со педијатарот на вашето дете.
Ако вашето бебе ги толерира првите неколку намирници и нема причина да мислите дека има зголемен ризик од алергии на храна, можете да почнете да воведувате намирници кои се посилни алергени. Ова вклучува храна како јајце, производи од јаткасти плодови, јогурт или други млечни производи, пченица, сусам, соја, риба и школки. Идеално е производите со кикиритки да се воведат кај овие бебиња што е можно порано, на возраст од 4 до 6 месеци. Студиите сугерираат дека подолгото чекање може да го зголеми ризикот од развој на алергија.
- Започнете со мали количини. Ако бебето не покажува знаци на нетолеранција или алергиски симптоми, количината може постепено да се зголемува. Потоа, редовно вклучувајте ги во исхраната во порции соодветни за возраста (на пример, 2 лажички путер од кикиритки, путери од јатки како индиски орев или сусам тахини, околу 1/3 од добро сварено јајце – кајгана или тврдо варено).
- Секогаш давајте ја храната во форма и текстура прилагодена за бебиња. На пример, иако кравјо млеко како пијалак не се препорачува пред првата година, можете да воведете преработени млечни производи, како јогурт од полномасно млеко или грчки јогурт измешан со овошје кое бебето веќе го пробало.
Ако вашето бебе има или имало тешка, перзистентна егзема или непосредна алергиска реакција на која било храна – особено на силен алерген како јајцето – се смета дека е со „висок ризик од алергија на кикиритки“. Во тој случај, прво разговарајте со педијатар за да утврдите како и кога најбезбедно да ги воведете овие алергени во исхраната.
Како да се спречи задушување при воведување цврста храна
- Не давајте цели кикиритки или јаткасти плодови на бебиња или мали деца – тие се ризик за задушување. Можат да ги блокираат дишните патишта, а ако цели или делумно изџвакани кикиритки се вдишат во белите дробови, може да предизвикаат тешка и можеби фатална хемиска пневмонија. Избегнувајте цели кикиритки додека вашето дете не биде доволно големо за безбедно да ги џвака (обично најмалку 4 години и нагоре).
- За воведување кикиритки кај бебињата, еден безбеден начин е мешање и разредување на мала количина путер од кикиритки во житарки, пире од овошје или јогурт. Растворање на путер од кикиритки во мајчино млеко или адаптирано млеко и давање со лажичка е уште една добра опција.
Запомнете
Подготвеноста на секое дете за цврста храна зависи од неговиот индивидуален развој. Откако ќе биде подготвено, обично околу 6 месеци, нема докази дека одложеното воведување на алергени како јајце, кикиритки, млечни производи и сусам спречува алергии. Не двоумете се да разговарате со педијатарот ако имате какви било прашања во врска со исхраната на вашето бебе.
Забелешка: Американската академија за педијатрија (AAP) препорачува ексклузивно доење како единствен извор на исхрана за вашето бебе во првите 6 месеци. Кога ќе воведете цврста храна во исхраната на бебето, продолжете со доење онолку долго колку што вие и вашето бебе сакате, до 2 години или подолго. Консултирајте се со лекар за додатоци на витамин Д и железо во текот на првата година.
За авторите:
Д-р Аманда Кокс е асистент професор по педијатрија во Одделот за детска алергологија и имунологија на Icahn School of Medicine на Mount Sinai во Њујорк и детски алерголог во Jaffe Food Allergy Institute
Д-р Мајкл Пистинер е детски алерголог и директор на Одделот за застапување, едукација и превенција на алергии на храна во Mass General for Children, Harvard Medical School. Специјализира превенција и менаџирање на алергии на храна кај доенчиња и мали деца, со фокус на стратегии за рано воведување
(Извор: ААП)
