Важните пресвртници во детскиот живот се знак за раст на неговата независност, а иако многу родители ги очекуваат на точно одредена возраст, тие се случуваат тогаш кога детето е навистина подготвено. Стручњаците советуваат да не ги брзате децата во реализирањето на тие цели, туку да го набљудувате нивниот интерес и подготвеност.
- Преминување на цврста храна
Воведувањето на дохрана не се препорачува пред шестиот месец, бидејќи дотогаш дигестивниот систем на бебето не е доволно развиен. Некои од развојните знаци кои покажуваат дека бебето е подготвено е и исправеното држење на главата, како и движењето на главата на двете страни, потоа отворање на уста кога се нуди храна и самостојно седење, како и наведнување нанапред.
Ако детето може да фати некој предмет и да го стави во уста, тогаш ќе се снаоѓа и со храна во рацете или со лажица. Ако заинтересирано се гледа додека јадете и сака да учествува, подготвено е за дохрана.
- Учење за тоалет
Повеќето деца се подготвени за учење за во тоалет некаде помеѓу 18 месеци и 4 години. Најчесто тоа е околу втората и третата година, но само вашето дете го знае вистинското време. Одвикнувањето од пелени никогаш не треба да го правите само затоа што мислите дека е време за тоа.
Некои од знаците на подготвеност се сува пелена најмалку два часа, предупредување од детето кога треба да оди во тоалет, се жали дека пелената е влажна затоа што не му се допаѓа тоа чувство, како и способност самостојно да ги спушта и подигнува панталоните и да седне во тоалетот.
- Попладневно спиење
Во најголем дел, сите деца престануваат со попладневно спиење пред училиште, некаде на возраст од три до шест години. Некои родители го исфрлаат ова спиење како подготовка за во градинка, а наместо спиење воведуваат мирно време за одмор.
Доколку детето не покажува знаци на замор во текот на денот, е активно и разиграно, веројатно не му е потребна попладневен сон.
- Спиење во поголем кревет или во своја соба
Повеќето деца преминуваат од креветче во детски кревет околу тригодишна возраст. Ако детето постојано се качува и се обидува да излезе од креветчето или ако душекот станал премал, време е за нов кревет.
На детето ќе му биде полесно да го прифати креветот во вашата соба, но можете да го забрзате преминот во сопствена соба така што ќе поминувате време со детето во таа соба, ќе ја опремите за игра и ќе се гушкате со детето пред спиење. Не е препорачливо да се изврши оваа транзиција при доаѓањето на ново бебе.
