Голем број родители ги мачи прашањето до кога детето треба да спие со нив во соба и како да препознаат дека е подготвено за одвојување во текот на ноќта. Психолог објаснува дека тоа вообичаено се случува кога една од страните, или родителот или детето тоа ќе го посака и за тоа не постои одредена возраст.
Ако одлуката е на мама и тато
Доколку е тоа ваша желба, многу полесно ќе му објасните на дете колку е постаро. Но, повеќето деца веќе на возраст од четири години се подготвени на одвојување во своја соба. Добро е да се оди чекор по чекор. Ако детето инаку спиело со вас во кревет, прво научете го само да заспие во свој кревет, без ваша присутност.
Може да оставите мала светлина во собата и ходникот, малку да ја отворите вратата и да му кажете дека сте во близина. Потоа, психолозите советуваат да ја уредите детската соба и да го навикнувате детето во неа да си игра во текот на денот, во неговата соба да му доаѓаат другарчиња за игра, за да се “соживее“ со просторот.
Доколку се работи за дете над четири години, понудете му да покрај него спие и неговата омилена играчка. Ако се работи за помало дете, не правете нагла промена и ако детето има потреба од вашата близина, задоволете му ја. Трпеливо успивајте го, бидејќи така му испраќате порака дека се е во ред, дека сте тука ако му затребате.
Ако детето само сака своја соба
Ако, пак, детето само изрази желба да спие во своја соба и во свој кревет, таа транзиција е секогаш речиси безболна.
Детето е подготвено за својата соба кога ќе посака да ја затвори вратата, да си игра само или со пријателите, заштитено од погледите на другите. Собата е слика на зрелост на детето: место каде што го наоѓа својот мир зад затворени врати (и притоа не се плаши) и каде што има потреба да си игра без набљудувачи.
