Празниците и семејните собири носат многу радост, храна, смеа – и често неизбежен момент кога детето треба да ги поздрави роднините. Бабите ги рашируваат рацете, роднините се насмевнуваат и се наведнуваат кон детето, а родителите во себе си мислат: Што ако моето дете не сака прегратка?
„Допирот никогаш не треба да биде присилен“
Педијатарката и експерт за родителство, д-р Дебора Гилбоа, објаснува дека токму ваквите ситуации се предизвикувачки, бидејќи се судираат „убавото однесување“ и телесната автономија.
„Физичкиот допир никогаш не треба да биде присилен. Ги збунуваме децата ако ги учиме за приватност и безбедност на телото, а потоа ги тераме на прегратка што не им е пријатна,“ вели д-р Гилбоа.
Слично предупредува и Карен Дејс, поранешна претседателка на Центарот за безбедност и заштита на семејствата при детската болница Nationwide. Според неа, ако ги тераме децата да прифатат несакана прегратка, им праќаме погрешна порака — дека возрасните што ги познаваат секогаш имаат право на физички контакт.
„Родителите често ги учат децата да се пазат од непознати, но забораваат да нагласат дека и познатите треба да ги почитуваат нивните граници,“ вели Дејс. „Ако детето тоа не го научи навреме, потешко ќе препознае ситуација во која некој ја преминува границата.“
Разговор пред семејните собири
Стручњаците советуваат родителите да разговараат со децата пред семејните собири, за да дознаат како се чувствуваат и што им е пријатно.
Психологот Мишел Борба препорачува: „Прашајте го детето зошто му е непријатно. Дали е тоа срамежливост? Дали не ја познава личноста? Или можеби има лошо искуство? Отворениот разговор помага подобро да разберете што се крие зад неговото ‘не’.“
Ако детето не сака прегратка, постојат многу други начини да покаже љубов и почит без физички контакт. Може да даде „петка“, да мавне со рака или да покаже цртеж што го направило само за таа личност. Може да покаже видео од тренинг, да отпее песна или едноставно да каже: „Ми е драго што те видов.“
Сето тоа, велат експертите, пренесува топлина и блискост – но на начин што му одговара на самото дете.
