Сè и сешто доживуваме од нашите деца. Да, тоа звучи како реченица на некоја баба или како претерување, но навистина сме навикнати на сè. Кога ќе пораснат, таа реченица добива посебна тежина и повикува на зацврстување на границите, но додека се мали, сè е далеку побезазлено. Сепак, ретко што може да нè извади од такт како решителното и упорно (да не кажеме тврдоглаво) детско „не“.
Иако тоа е многу иритирачко и сме решени да се бориме против него – со право, затоа што „кој е тоа мало суштество што ќе ни командува?!“ – понекогаш може да се обидеме овој мал проблем да го заобиколиме и на некој начин „да го надмудриме“ детето, за на крај да владее мир и работите да завршат по наше. Причината зошто детето се однесува така во тој момент, искрено, и не нè интересира премногу – иако знаеме дека може да е уморно, гладно, возбудено или фрустрирано. Добро, нè интересира, но уште повеќе сакаме детето да го направи она што треба во тој момент. Една мајка вели дека ја „открила шифрата“ за тоа.
Мајката Рејчел, која често споделува родителска содржина на социјалните мрежи, дома има две мали деца – тригодишниот Џуниор и двегодишната ќерка Роми. Откако неколку дена по ред ќерка ѝ постојано ѝ велела „не“ и одбивала да направи што и да ѝ побара, Рејчел се сетила на еден родителски совет кој веќе го користела и го проверила со својот син.
Со останатите родители го споделила овој подзаборавен трик.
„Не знам за другите, но моите мали деца воопшто не ме слушаат. Сепак, мислам дека сфатив во што е работата и морам да го споделам ова. Тоа е нешто што порано го правев со синот, но понекогаш едноставно ги забораваме тие родителски моменти кои некогаш ни помагале“, започнала Рејчел, додавајќи дека омилениот збор на нејзината двегодишна ќерка во моментов е токму „не“ – и дека буквално за сè вели „не“.
Она на што се сетила е промена во вокабуларот, односно во начинот на кој бара нешто од детето. Наместо да каже „облечи се“, таа вели: „покажи ѝ на мама како се облекуваш“.
„Утрово се обидував да ги подготвам за во градинка, а тие едноставно не сакаа да ги соблечат пижамите за да се облечат. Денес им реков: ‘покажете ми како ги соблекувате пижамите’, ‘покажи ми како се облекуваш, дојди и покажи ми како се прави тоа’. Ова го користев и со синот, бидејќи одамна прочитав дека една друга мајка го правела истото со нејзините деца. Децата сакаат да ви покажат дека знаат и дека можат сами нешто да направат“, објаснила Рејчел.
Да, мала промена во начинот на кој им се обраќаме може да направи чуда и да ги спаси утринските драми – или која било друга драма. Многумина, очигледно, веќе ја знаат оваа тактика и се согласуваат дека навистина прави разлика во однесувањето на нивните деца, што може да се види и од бројните коментари под видеото.
Една мајка напишала: „Секогаш функционира! Или ако кажам: ‘Хети, ќе ти мерам време! Колку брзо можеш да ставиш паста за заби на четката или колку брзо можеш да средиш?’“
Друга личност додала: „Промената на вокабуларот навистина може да ги смени правилата на игра! Мојот син, кој сега има три години, ужасно гризеше и да му кажеме ‘не гризи’ или ‘престани да гризеш’ никогаш не функционираше. На крај, кога почнавме да зборуваме дека забите се за јадење или џвакање, работите навистина се сменија… Всушност, ни помогна тоа што целосно го исфрливме зборот ‘гризење’.“
