Во нашата природа е да се стремиме да се поврземе со другите за да се развиваме емоционално, физички, духовно и интелектуално, велат психолозите. Секој од нас треба да знае дека е ценет, сакан, виден и достоен за внимание, па така и децата. Тоа е сосема природно изразување на потребата и нема ништо манипулативно во тоа, потенцираат експертите за детски развој. Тие објаснуваат што да правите во ситуации кога вашето дете бара од вас внимание.
Слушајте што сака да ви каже
Секое однесување на детето е начин на комуникација. Она што децата кои навидум бараат многу внимание, комуницирањето е всушност нивна вистинска потреба за поврзување. Кога некој ќе покаже таква потреба, тогаш е важно да го ислушаме и да му дадеме до знаење дека се грижиме.
Задоволете ги нивните потреби
Ако на вашето дете му треба внимание, дајте му го. Играјте, прегрнете го, тешете го детето и покажете му дека ви е важно. Не можете да го разгалите детето ако му го посветите вниманието и љубовта што му е потребна.
Заборавете на манипулацијата
Децата понекогаш ќе бараат внимание на лош начин и ќе ни се чини како да манипулираат со нас. Можеби нашите најблиски ќе ни дофрлат таков коментар и ќе предложат да ги игнорираме.
Не ги прифаќајте таквите мисли, ниту коментари бидејќи дури и негативниот начин на барање внимание ја покажува вистинската потреба на детето за поврзување.Понекогаш децата бараат внимание на погрешни начини бидејќи мислат дека во спротивно нивните потреби нема да бидат задоволени.
Дајте им љубов
Редовно покажувајте му љубов на вашето дете и посветувајте му го потребното внимание. Прифатете дека сите деца се различни и дека на некои им треба многу повеќе внимание од другите, а некои реагираат на различен вид на внимание. Најдете го она што најмногу им одговара. Вниманието не е нешто што треба да се води од разумот. Тоа е вистинска потреба на детето и не му ја скратувајте.
