По прележана вирусна инфекција, враќањето во колектив, било да е тоа градинка или училиште, не треба да се случи веднаш по подобрување на симптомите. Потребно е да се испочитуваат неколку важни услови, со цел да се заштитат сите во колективот од евентуално ширење на инфекцијата.
- Нормална телесна температура најмалку 24 часа без употреба на лекови
Еден од главните показатели дека организмот заздравува е стабилизирана телесна температура. Ако детето имало покачена температура, треба да поминат најмалку 24 часа без покачена температура, и тоа без помош на антипиретици (како парацетамол или ибупрофен), пред да се почне да се размислува за враќање во колектив.
- Добра општа здравствена состојба
Важно е детето да се чувствува добро – да нема замор, главоболка, слабост, губење на апетит или други симптоми кои укажуваат дека организмот сѐ уште се бори со инфекцијата. Детето треба да биде расположено, да има желба за игра и нормално да јаде и да пие.
Важно е детето да се чувствува добро – да нема замор, главоболка, слабост, губење на апетит или други симптоми кои укажуваат дека организмот сѐ уште се бори со инфекцијата. Детето треба да биде расположено, да има желба за игра и нормално да јаде и да пие
- Отсуство на симптоми кои се потенцијално заразни
Враќањето во колектив не е препорачливо сѐ додека се присутни некои од следниве симптоми:
- Кашлица, особено ако е продуктивна (со искашлување) и се уште е честа или интензивна.
- Секрет од нос, посебно ако е густ, жолт или зелен, што може да укажува на активна инфекција.
- Проблеми со дигестивниот систем, како пролив или повраќање. Треба да поминат најмалку 48 часа по последната епизода за да се избегне ризик од заразување на другите.
- Совет од матичен лекар или педијатар
Секогаш е добро да се посоветувате со лекар, особено ако инфекцијата била посериозна, ако се користеле антибиотици, или ако детето има хронични болести. Лекарот може да даде препорака, според текот на болеста и општата состојба на детето.
Во праксата, докторите често препорачуваат да поминат неколку дена по исчезнување на симптомите пред враќање во колектив, за да се обезбеди целосно закрепнување и да се намали ризикот од заразување на други деца или од повторна инфекција.
