Без разлика дали го кажал член на семејството или некој добронамерен познаник, речиси секој нов родител во одреден момент го слушнал истото предупредување: “Ако го држите во раце бебето секогаш кога ќе заплаче, ќе го разгалите“.
Но, вистината е сосема поинаква, велат експертите, невозможно е да се разгали новороденче.
- Новороденчињата плачат затоа што имаат свои потреби
Потребата на секое новороденче е да биде нахрането, да ја почувствува вашата физичка близина, да го утешите и сакате. Ваша задача, како родител, е да ја слушате вашата интуиција и инстинкти и да одговорите на потребите на вашето бебе најдобро што можете. Ако тоа значи да го носите вашето бебе во марама додека перете алишта или да станувате на секои два часа во текот на ноќта за да доите, нека биде така. Таквата грижа нема да го разгали вашето новороденче – далеку од тоа.
Кога реагирате на плачот на вашето бебе и се обидувате да ги задоволите неговите потреби, му давате чувство на сигурност и прифаќање. Ако бебето се чувствува безбедно и сакано, тоа помалку ќе плаче. Бебињата кои чувствуваат поврзаност со своите родители лесно се смируваат.
- Новороденчињата не можат да манипулираат
Загрижени сте дека бебето можеби плаче за да ве манипулира? Така мали тие сигурно не се пресметани. Потребите и желбите на новороденчињата се многу поочигледни.
Значи, секој пат кога вие или вашиот партнер брзо реагирате на плачот на вашето дете за храна, гушкање или успивање, му давате до знаење дека може да смета на вас. Затоа, нема да го разгалите бебето, туку ќе му помогнете да развие здрав однос со вас како родители.
Бебе кое е поврзано со своите родители е посреќно бебе со помалку потреби – и се развива во дете кое има храброст да “нурне“ во светот без да биде приврзано за вас.
- Приказната се менува по 6. месец од животот
Меѓутоа, кога вашето бебе ќе наполни 6 месеци, неговите желби ќе станат пософистицирани и можеби нема да бидат исти како потребите. На пример, постаро бебе можеби ќе сака да ви ја повлече косата или обетката, или можеби ќе го сака далечинскиот уравувач со сите тие интересни копчиња.
Во такви случаи, добро е да му поставите на детето некои граници. Користете различни играчки за да го одвлечете вниманието на вашето бебе и тргнете ги предметите со кои не треба да си игра. Кога комуницирате со бебето, користете афирмативни реченици наместо негативни, како “Вака го галиме кучето“ наместо “Не го влечи кучето за опашката!“ На овој начин детето на крајот ќе научи дека не секогаш му го давате она што го сака, но дека сепак го сакате.
