Пред нас е сезона на бобинки, јагодите се веќе на пазарите, па многу мајки се прашуваат дали на своите бебиња да им внесат во исхраната, малини, јагоди, рибизли или да ја почекаат следната сезона. Ова прашање е важно бидејќи наведените бобинки спаѓаат во намирници кои често доведуваат до појава на алергиски реакции, во споредба со овошјето како банана, јаболка, круша…
Алергиската реакција на некоја намирница може да се појави уште од самиот почеток на нејизното воведување во исхраната, но и подоцна, доколку кај бебето постои склоност кон алергии (бебиња кои се атописки тип). Исто така, алергијата може да се јави доколку некоја намирница се внесе во бебешката исхрана предвреме, а ова особено се однесува на високалергените намирници како бобинките, медот, цитрусното овошје, кикирики…
КАКО ИЗГЛЕДА АЛЕРГИСКА РЕАКЦИЈА КАЈ БЕБЕ?
Ако детето непосредно по земањето на некоја, за бебињата нова намирница, се јавува осип по кожата, повраќање, пролив, болка во стомакот, кашлица, гушење, екстремна вознемиреност. Тогаш таа намирница се исклучува од употреба: на почетокот на некој период, а ако треба, за жал и засекогаш. Секако, добро е по неколку недели или месеци да се проба на детето повторно да му се даде таа намирница, во многу мали количини, и повторно да се следи реакцијата. Знае да се случи детето да ја “надрасне“ и алергиската реакција на таа храна повторно да не се јави.
СОВЕТ
Ако бебето се ближи до својот прв роденден и досега немало алергиска реакција на ниту една намирница, можно е и оваа сезона да му воведете бобинки (малини, јагоди, капини, рибизли) во помали колични. Но, доколку бебето има 6, 7 но и 10 месеци, се советува сепак да се почека идната сезона кога ова овошје може свежо да му го понудите на детето. Важно е бобинките да се воведуваат одделно, а овошен микс може да му подготвите, откако на детето ќе му се воведе секое од ова овошје одделно.
