Повраќањето е сосема нормална појава и е целосно безопасно во повеќето случаи, ако не трае повеќе од два дена и не е знак за некое потешко заболување. Најчеста причина за повраќање кај децата и бебињата е гастроентеритис, инфекција која најчесто е испровоцирана од вирус или бактерија, кои исто така предизвикуваат и пролив. Со ваквото заболување детскиот имун систем сам од себе ќе се избори по неколку дена и не е неопходно посебно лекување, секако ако не е проследено со некои потешки симптоми. Бебињата често повраќаат доколку при доење проголтаат повеќе воздух, но честото повраќање проследено со други симптоми како осип или висока температура може да биде знак за тешко заболување.
Што да направите?
Ако детето повраќа многу е важно внимателно да го следите неговото однесување, слушајте го својот инстикт и ако сметате дека нешто не е во ред, веднаш повикајте лекар, но без паника. Во случај на стомачен вирус детето, и покрај повраќањето, ќе чувствува потреба за храна и за играње, иако повраќањето може прилично да го исцрпи. Во тој случај продолжете да го храните детето како и обично и давајте му ги стандардните пијалоци.
Најважно е на детето да му обезбедите доволно течности за да не дехидрира. Исто така, за да не дојде повторно до повраќање, на детето давајте му помали количини течности, по една голтка на неколку минути. Ако бебето повраќа, продолжете со доење, бидејќи му требаат повеќе течности од вообичаено.
Доколку детето само повраќа, може да му давате и вода и сокови, но ако има и пролив, тогаш давајте му само чаеви без шеќер и раствори за рехидрација.
Ако детето е поголемо, задолжително понудете му да грицка нешто солено, што ќе ја собере киселината, како што се солени крекери или стапчиња. Многумина за мачнина препорачуваат кока-кола, но на вас е дали ќе му ја дадете на детето или не, главно многу мајки ширум светот тврдат дека е многу ефикасна кога се работи за ублажување на мачнини и нагони за повраќање.
Знаци на дехидрација
Честото повраќање кај децата многу лесно може да доведе и до дехидрација, особено кога станува збор за бебиња и затоа е важно да знаете кои се првите симптоми:
- Сува уста
- Плачење без солзи
- Послабо уринирање од вообичаено
- Засилена жед
Доколку покрај сето она што сте го превземале, детето и понатаму е безволно, треба да отидете на лекар. Посебно обрнете внимание на следните работи:
- Детето повраќа подолго од 24 часа
- Детето не може да задржи течности во себе подолго од осум часа
- Детето е безволно, нервозно, одбива храна и се однесува необично
- Чувствува силна болка во стомакот
- Чувствува главоболка и вкочанетост во вратот
Во повеќето случаи знае да се случи да детето се плаши од повраќањето и затоа обидете да ги отргнете тие стравови. Научете го детето дека е важно само да исфрли се од себе, ништо да не задржува или голта, и уверете го дека не може ништо лошо да му се случи. Често знае да се случи децата едноставно да не знаат да повраќаат и неконтролирано ја голтаат содржината што им го сопира здивот и се плашат да не се загушат.
