Алергијата на храна е всушност абнормална и ненадејна реакција на телото на одредена намирница што детето ја консумирало. Како што објаснуваат педијатрите, важно е да се знае дека алергијата на храна се разликува од интолеранцијата, иако некои од симптомите може да бидат многу слични.
Имено, алергијата на храна предизвикува зголемен одговор на имунолошкиот систем, предизвикувајќи необични симптоми кај детето кои варираат од многу непријатни до оние кои се потенцијално опасни по живот. Од друга страна, интолеранцијата на храна не влијае на имунолошкиот систем на детето, па со самото тоа нема толку опасни несакани ефекти.
Но, како да препознаете дека детето е алергично на одредена храна? Знаците кои укажуваат на алергија првенствено вклучуваат појава на уртикарија, осип, проблеми со дишењето, чешање, црвенило, болки во стомакот, повраќање или дијареја, пишува „Johns Hopkins Medicine“.
Исто така, постојат и одредени намирници кои се најчести предизвикувачи алергија на храна. Како што објаснуваат лекарите, приближно 90 проценти од сите алергии на храна се предизвикани од јадење на следните седум намирници:
- млеко,
- јајца,
- пченица,
- соја,
- ореви,
- риба,
- школки.
Јајцата, млекото и кикиритките се најчести причинители за алергии на храна кај децата, а потоа следуваат пченицата, сојата и јаткастите плодови. Исто така, педијатрите велат дека јаткастите плодови, рибите и школките предизвикуваат најтешки реакции. Речиси пет проценти од децата на возраст под пет години имаат некој вид на алергија на храна.
Од 1997 до 2007 година, преваленцата на пријавени алергии на храна се зголемила за неверојатни 18 проценти кај децата на возраст под 18 години. Иако повеќето деца ги „надраснуваат“ алергиите и тие никогаш не се враќаат, алергијата на јаткасти плодови, риба и школки во повеќето случаи може да биде доживотна.
