Помеѓу два и три проценти од децата во светот страдаат од депресија и тоа на возраст од шест до 12 години, додека процентот двојно се зголемува во групата на тинејџери. Стручњаците нагласуваат родителите да обрнат посебно внимание на симптомите на депресија, токму во овој период на подолга изолација, карантин и социјална дистанца. Според нив, ова се знаците кои укажуваат дека детето може да се соочува со депресија:
Детето често плаче
Плачењето е начин детето да каже “Жал ми е“. Тоа е важно да се запомни, особено како децата растат бидејќи како растат тие се потешко се доверуваат. Научете да прочитате од солзите дека децата имаат проблем и дека плачењето поради нешто неважно е всушност плач за нешто што ги мачи. Нивната солза може да биде крик за помош кој не знаат да го кажат на друг начин.
Се повеќе е мрзеливо
Ова, потенцираат стручњаците ако не е е нормално однесување за детето, мрзеливоста би можела да биде знак на недостаток на мотивација. Тешко дека детето ќе му се довери на родителот или дека ќе знае да каже како се чувствува, па на родителите е сами да оценат дали станува збор за сериозна состојба или минлив замор.
Проблеми со спиењето
Ако детето спиело долго, а одеднаш не може да заспие со часови, треба да обрнете внимание и да ја пронајдете причината. На внимание упатува и спротивен тренд, ако детето постојано чувствува замор, дури и по долго спиење. Децата од 6 до 12 години дневно треба да спијат од 9 до 12 часа, а тинејџерите од 13 до 18 години, од 8 до 10 часа.
Недоволно се концентрира
Иако е познато дека децата тешко може да се концентрираат, губењето на концентрацијата на која сте навикнале кај своето дете дефинитивно е повик за внимание. Особено ако губењето на концентрацијата се случува околу нешто што особено го сакале – читање, играње игри, слушање приказни.
Детските психолози укажуваат дека децата со депресија често доживуваат и промени во апетитот. Депресијата, додаваат тие, има тенденција да го отфрли секое самопочитување кое детето го има и создава чувство на вина. Кај децата тоа може да се забележи ако се извинува премногу или долго се чувствува виновно поради некоја грешка. Ако вашето дете одеднаш стане раздразливо и на се бурно реагира, можно е нешто навистина да го мачи со што тешко се носи и му е потребна помош.
