Секоја година на 8 јуни се одбележува Светскиот ден на туморот на мозок. Иако почесто се јавува кај возрасната популација, од оваа агресивна болест не се поштедени ниту децата. Според статистиките, туморите на мозок се најчестите солидни тумори во детската возраст и втори по честота кај педијатриската неоплазма, веднаш зад леукемијата. Тие се водечка причина за смртност кај педијатриските оноколошки пациенти.
На еден милион деца до 15 години, се дијагностицираат приближно 35 случаи на тумор на мозокот. Најчесто се појавуваат помеѓу 3. и 7. година од животот.
Клиничката слика е разнолика, и зависи од возраста на детето, локацијата и видот на туморот. Како и кај повеќето тумори, болеста е важно да се препознае навреме.
“Симптомите, стануваат сомнителни ако траат подолго од две недели. Предолги главоболки, ако детето ја држи накриво подолго од две недели, пореметување во одот, што секој родител прво ќе го забележи. Симптом е и повраќањето кое не е од вироза или некоја друга помалку сериозна болест, особено ако детето повраќа во млаз наутро по будење и пред оброк. Доколку кај детето се јави двојна слика, ако му се тресат рацете или нозете, и во најлош случај ако детето не може да оди, треба веднаш да се побара лекарска помош“, објаснуваат невропедијатрите.
Тие потенцираат дека ако постои сомнеж, детето треба да се упати кај невропедијатар кој со преглед на невролошкиот статус на детето, па дури и кај помалите деца може да направи разлика дали симптомите се во рамките на нормала или се случува нешто посериозно.
Експертите велат дека причините за појава на тумор на мозок кај детето се мултифакторијални, и зависат и од генетиката, и од околината.
