Кога му нудите зеленчук на детето, најважно е да подготвите оброк со што повеќе витамини. Колку хранливи материи ќе внесе во организмот зависи од начинот на кој подготвувате одредени намирници. Некои ја губат хранливата вредност со готвењето, а некои на тој начин ослободуваат повеќе витамини, објаснуваат нутриционистите.
Намирници кои треба да се јадат сурови
- ЦВЕКЛО
Богато е со растителни влакна, витамин Ц, калиум, манган и витамин Б комплекс, односно фолати – хранливи материи кои помагаат во зајакнувањето на имуниот систем, ја зголемуваат енергијата и се борат против воспаленијата. Салатата од цвекло е поздрава ако не го варите, односно готвите, бидејќи високата температура ја намалува концентрацијата на фолати (витамини Б) за 25 проценти. Фолатите, инаку, се дел од витаминскиот комплекс Б, кои се неопходни за формирање на црвени и бели крвни зрнца во коскената срцевина, за претворање на јаглехидратите во енергија и за формирање на ДНК и РНК.
- БРОКУЛА
Брокулата сварена на пареа може да биде вкусна, но подобро е да ја јадете сурова. Таа е богата со витамин Ц, калциум, калиум, протеини и сулфорафан, природно растително соединение кое помага во борбата против клетките на ракот и го забавува стареењето.Резултати од студија покажале дека децата кои ја јадат оваа храна во сурова форма подобро го апсорбираат сулфорафанот.
- ЦРВЕНА ПИПЕРКА
Доколку сакате да ги искористите безбројните здравствени придобивки од црвените пиперки, јадете ги сурови. Црвените пиперки содржат едно од највисоките нивоа на витамин Ц, како и витамин Б6, витамин Е и магнезиум. Проблемот со готвењето на пиперките е што содржината на витамин Ц веднаш се намалува. Доколку децата ги претпочитаат термички обработени, одлучете се за кратко пржење или печење, бидејќи така се зачувуваат повеќе од нивните витамини.
- ЛУК
Содржи две клучни соединенија: аминокиселина богата со сулфур и ензим базиран на протеини. Лукот нема мирис додека не го згмечите или исечкате. Тој е моќен природен антибиотик и има антигабични и антивирусни својства. Готвењето го убива алицинот кој го има само во суровиот лук и предизвикува негово формирање во други соединенија кои се помалку значајни. Лукот содржи бакар, железо, цинк, калциум, манган , алуминиум, германиум и селен. Нивото на селен во лукот е повисоко отколку во другите намирници.
Намирници кои треба да се јадат зготвени
- ДОМАТ
Вкусен е свеж, во салата, но поздрав зготвен. Тоа е затоа што доматите содржат природно соединение – ликопен, кој го има во сите овошја и зеленчуци со силни бои. Ликопенот е антиоксидант кој може да помогне во заштитата од некои хронични болести, како што се кардиоваскуларни болести. Во случајот со доматите, ликопенот полесно се апсорбира кога доматите се изложени на високи температури, односно кога се варат.
- МОДАР ПАТЛИЏАН
Готвењето го зголемува нивото на антоцијанин, фитонутриент кој се наоѓа во кожата. Модриот патлиџан е богат со витамини, минерали, влакна и антиоксиданти.
- МОРКОВ
Морковите се добар извор на бета-каротен, влакна, витамин К1, калиум и антиоксиданти. Иако се вкусни и сурови, готвењето ја зголемува содржината на хранливи материи. Варените моркови содржат повеќе бета-каротен, антиоксидант кој се претвора во витамин А во телото, што е добро за очите и за имуниот систем.
